رواية ( أصدقاء للأبد لو يطول الأمد ) روووعة

[المسلمةالمسالمة]

الجزء الثامن 8

لين : الوو اهلين
ربى : هلا لييييين عرفت من يقصد اخوك
لين : مين ؟!!!
ربى : ولد عمي خطبني اليوم
لين : احلفي !!
ربى : ايه .. بس مو مملوح
لين : طيب متى شاف سامي ... علشان يقول اعرفه ..
ربى : والله مدري
لين : بس هو يقول الخميس الي مو الجاي اللي بعده
ربى : امممم حيرتيني ... طيب يمكن ما قدر يصبر
لين : اممممممم يمكن .... طيب انتي تبينه
ربى : لا رفضت علطول .. وش ابي فيه
لين : لييييش !!؟
ربى : بس صاير مشاكل بيني وبين اخته
لين : وانتي وش عليك من اخته
ربى : حتى هو يقول ابوي انه ما يصلح لك سالته ليش قال الله يستر عليه وما قال لي
لين : اها ...
ربى : وش صار عليكم انتي وبندر وش اخباركم بعد الشبكة
لين : الحمدلله ... بس يقولون انه سافر
ربى : وين سافر ؟
لين : ما ادري
ربى : طيب حللتي ؟
لين : ايه من قبل اسبوع
ربى : متى تطلع النتايج
لين : يمكن بعد اسبوع ...
ربى : طيب ما ابي اطول عليك البوو .. سلامي للجميع
لين : ههههه ما خليتي شي ما سألتي عنه ..
ربى : عاد انتي تعرفين صديقتك ملقوفه ههههه ... يله مع السلامة
لين : مع السلامة
%%%%%%%%%%%%%%%%%
لين بعد ما سكرت السماعة راحت عند سامي ... طقت الباب ودخلت
سامي جالس على طاوله وداخل على النت .. ومتحمس وما درى ان لين دخلت عليه
لين : هههههههههههههههههه
سامي خاف والتفت عليها : باسم الله وجع وش تبين
لين : عرفت
سامي : مبروك ...... سكت شوي .......... وش عرفتي
لين : ههههههه لا خلاص بعدين شكلك متحمس مره
سامي : قولي بس ... تستهبلين انتي
لين : عرفت من تقصد بالمملوح ..اليوم جاء وخطب ربى
سامي ضاق صدره وتغيرت ملامح وجهه : وش تقولين انتي !!
لين : وش فيك تغيرت ملامح وجهك
سامي : مين اللي خطبها ؟؟!
لين : ولد عمها
سامي : ولد عمها !! وسكت
لين : وش فيك ...
سامي خانقته العبره : ما فيني شي
لين حست انه هو اللي يبي يخطبها : امممممم بس تقول انه مو مملوح
سامي سااااااكت وما سمعها ... صار يهوووجس
لين : ساااااااااااامي سامي سامي
سامي : هااااااه وشو
لين : ابشرك ما وافقت
سامي : خلااص اطلعي بسرعة وسكري الباب ولا احد يدخل علي .
لين مستغربه : ان شاء الله
طلعت وسكرت الباب وهي تكلم نفسها : غرييبة وش فيه .. لا يكون هو بس اللي يبي يخطبها .. امممم طيب ليش عصّب ..يا ليتني ماقلت له شي

عند سامي ...
سامي تضايق مررره يوم سمع ان ربى انخطبت وبينه وبين نفسه : اوو الحمدلله ربى ما وافقت على ولد عمها ... امممممم . ياترى هي بتوافق علي اذا خطبتها . امممم خليني اقوم استخير اول ...... وقام توضأ واستخار ربه
%%%%%%%%%%%%%%%%%%%%%%
بعد اسبوع
طلعت نتائج تحاليل لين وبندر
جوري : لين
لين : نعم
جوري : اليوم بتجي ام حسام وبناتها
لين : الله يحييهم .... متى ؟
جوري: هم بالطريق الحين ... قومي تجهزي والبسي
لين : وشوله اتجهز هم اهلنا ومتعودين علينا
%%%%%%%%%%%%%%%%%
رن جرس الباب
جوري : الله جت رحاب
وراحت ترررركض تبي تفتح الباب : مييييييييييييييييييين
بندر : انا بندر
جوري : مين بندر !!!!!
بندر : ايه
جوري بحزن : لحظه
وصارت تصرخ هالفضيحة : لييييييييين ليييييين جاء بندر
والمشكله بندر يسمع !
لين بصوت واطي : اص اص فضحتينا . روحي نادي ابوي لاتناديني وش دخلني
جوري : طيب
وراحت عند ابوها
جوري : يبه بندر عند الباب
ابو سامي : قولي لسامي يفتح انا الحين جاي
راح سامي بسرعة وفتح لبندر
سامي : ياااااا حيا الله من جانا وش لونكم
بندر : الحمدلله وش اخباركم انتم
سامي : بخير جعلك بخير
دخل ابو سامي : هلا والله
بندر : هلا وش لونك
ابو سامي : بخير ... الحمدلله على سلامتك
بندر : يسلمك ربي
ابو سامي : وين سافرت ؟
بندر: جدة
ابو سامي : اها علشان الشغل
بندر : ايه
سامي : وش السالفه
ابو سامي : ما رح تفهم ... شي خااص
بندر : عني انا جاي علشان احدد الملكة انا واياكم ..
ابو سامي : اييه الملكة ... طيب متى تبيها
بندر: وش رايك يوم السبت حلو ؟
ابو سامي : امممم ايه حلو
بندر : موافقين ؟
ابو سامي : انا موافق بس مدري عن لين وامها .. بروح اسألهم واجي
بندر : خذ راحتك
سامي : ما شاء الله . كبرت يا ولد العم
بندر : عقبالك
سامي : وش شعورك لو لين تجي الحين وتقول انا ما ابيك
بندر : اقووول يا زينك ساكت بس .. لا تصير متشائم
سامي : عادي مجرد سؤال
بندر : اسكت لا اتوطا ببطنك
سامي : افااا كل هذا علشان لين
بندر : سامي استح على وجهك عيب
سامي : ان شاء الله
جاء ابو سامي ..
ابو سامي : وافقوا
بندر : زيييين .. يا الله انا استأذن الحين
سامي : هآآو اقعد شوي خلني اهبل فيك
بندر : لا الله يجزاك خير
ابو سامي : يا ابن الحلال تو الناس ما جلسنا معك
بندر : والله ابي اجلس معك الصراحة الجلسه معكم ما تنمل بس مشغووول مره
ابو سامي : الله يعينك
بندر : مع السلامة
سامي : بندر .. تبي اسلم لك على لين
بندر : ............... سكت والود وده يرجع ويضرب سامي بس استحى على وجهه وسكت
سامي : ما رديت
ابو سامي يبي يصرف : سلم لي على ابوك
بندر : ان شاء الله فمان الله
سامي : ههههه مع السلامة
وطلع ...
ابو سامي : سااامي .. انت ما تستحي على وجهك
سامي : هههههههههههههههههه مسكين تفشل
ابو سامي : الله يخلف بس
سامي راح لعند لين .: لييييييييين
لين : هااه وش تبي
سامي : بندر حدد الملكة
لين / ابوي قال لي
سامي تفشل : اها .......
جوري : ههههههههه طاح وجهه خخخخ
لين : لا تضحكين على اخوي
سامي : كفو والله هذي الاخت ولا بلاش ...
رن جرس الباب
جت ام حسام وبناتها .. وجلسوا وسواليف واكل الى آخر الليل
وبعدين راحوا

%%%%%%%%%%%%%%%%%%%%%%%
يوم الخميس (اليوم المنتظر لعند ربى ..)
سامي راح لعند امه اللي كانت جالسه لحالها
سامي : يمه
ام سامي : هلا
سامي بدون أي مقدمات : ابي اتزوج
ام حسام : هذي الساعة المباركه .. من عيوني ياوليدي من بكرا ابدأ ادور لك على بنيه .. وش تبي بعد
سامي : لاااااا يمه
ام سامي مستغربه : هآآآو اجل شلون تتزوج
سامي : انا اخترت البنت
ام سامي : مين
سامي : ربى بنت ابو حسام
ام سامي: ربى ربى ما غيرها
سامي : ايه ليش مو حلوه ؟
ام سامي : وش حلوه الا تهبل باسم الله عليها تنحط على الجرح ويبرى . مؤدبة وخلوقه وسنعة ما شاء الله ما فيها عيب ... طيب ليش اخترتها هي بالذات
سامي : ما ادري كذا كنت افكر قلت خلني اسأل عن ربى صديقة لين يمكن تصلح لي ..... ليش هي ما تصلح لي ؟
ام سامي : الا تصلح ... ما شاء الله عليك وش زينك وش ملحك اكيييييييد بوافقون علطول والكل يتمناك . جمال ومال ونسب وش يبوون اكثر من كذا
سامي : طيب اخطبيها لي .. وانا قبل لا اقول لك مستخير 4 مرات
ام سامي :ما شاء الله عليك ... طيب ان شاء الله بكرا اخطبها لك
سامي : لااا تكفين اليوم
ام سامي : خلاص
سامي : يله الحين
ام سامي راحت تتصل وسامي جاللس عندها ولين وجوري جالسين عند الباب يسمعون وش يقولون
سامي : يمه حطي مكبر الصوت علشان اسمع
ام سامي : لا
سامي : تكفين
ام سامي : لا
سامي : يمه الله يعافيك علشان ما تكررين الكلام يبعدين .
ام سامي اقتنعت : طيب
ربى : الووو
ام سامي : هلا والله وش لونك
ربى : ام سااااااامي
ام سامي : ايه
ربى : هلا والله وغلا شخبارك وشلون لين
ام سامي : الحمد لله كلهم بخير ... وين الوالدة
ربى : امممممم لحظه شوي
جت ام حسام
ام حسام : هلا
ام سامي : هلا والله وش لونك
ام حسام : الحمدلله
ام سامي : شوفي يا ام حسام انا بدخل بالموضوع علطول لاني ما احب المقدمات
ام حسام : تفضلي
ام سامي : سامي قرر يتزوج
ام حسام : ما شااااااااااء الله مبروك ... ومين سعيدة الحظ
ام سامي : ربى
ام حسام : يا هلا ومرررحبا فيكم ... لنا الشرف والله اننا نناسبكم
ام سامي : ترانا موافقين
ام سامي : طيب شاورتي ابوها وهي
ام حسام : وش يبون بعد .. ما فيه احد مثل سامي .. بس بسألهم دقيقه
ام حسام : ابوها موافق
ام سامي : طيب وربى اهم شي
ام حسام : امسكي كلميها وقولي لها . من يوم ما كلمتك وهي مزعجتني بس تسال لي وتقول وش السالفه
ام سامي : ههههههههه يا الله عطيني اياها
ام حسام : هههه دقيقه ... ربى ربى ربى
سامي يهمس لامه : يمه شفتي كل الناس يتمنوني
ام سامي : ايه ما شاء الله عليك
ربى : الووو
ام سامي : هلا والله وش لونك
ربى : الحمد لله .. وش فيكم وش فيها امي منهبله ..... آآآآآي
ام سامي : وش فيك باسم الله عليك
ربى : ههههه لا هذي امي تقول لا تسبيني .... وش عندكم ؟!!
ام سامي : جاك خطيب
ربى : اييييييييييييييش !!! انا .؟
ام سامي : ايه انتي ... ما شاء الله عليك وش ناقصك كامله والكامل الله سبحانه
ربى : ههههه مشكووره ..... ومين سعيد الحظ
ام سامي : سامي
ربى سكتت وتذكرت يوم يقول لها بيجيك واحد مملوح ..وبينها وبين نفسها : ايييييه يقصد نفسه ..
ام سامي : الوووو .... الوووو ... وينك وينك .... استحيتي؟
ربى بصوت هادي : هااااه لا لا معاك ..
ام سامي : يا الله وش قلتي ؟ موافقه ولا لا ؟
ربى استحت ووجهها حمر :اممممممم ... امي تبي تكلمك
ام سامي عرفت ان ربى استحت : هههههههه ... طيب
ام حسام : الووو هلا ام سامي .. اكلمك بعد يومين واعلمكم وش يصير مع ربى
ام سامي : طيب ليش ما تقرر الحين ..
ام حسام : لا لازم ربى تفكر ...
ام سامي : زين على راحتكم ... يا الله فمان الله
ام حسام : فمان الكريم
%%%%%%%%%%%%%%%%%%%%%%%%%%%
دخلوا لين وجوري على امهم وسامي
لين : غرفت مين المملوح
ام سامي : ايييش ؟؟
سامي يأشر للين يعني اسكتي
لين : لا لا ولا شي يا حليلها ربى استحت
ام سامي : ما شاء الله عليكم وانتم اكيد جالسين عند الباب تتسمعون
سامي : ايه يمه انا كنت ادري من زمان بس قلت خلهم يستانسون
جوري : ما اتوقع توافق عليك ...
ام سامي : هي الخسرانه ... سامي بسم الله عليه يجنن وحليل وخلوق
سامي بتكبر : اصلا ما فيه احلى مني
جوري: انا ما قلت انه وع بس كذا احس ربى ما تطيق بندر
سامي : اسكتي انتي بس يا متشائمه
%%%%%%%%%%%%%%%%%%%%%%%%
لين بسررعه راحت اخذت جوالها وارسلت مسج لربى وكتبت فيها
( عرفت مين المملوح مالت عليه .. صاير يغتر بنفسه . يله عاد وافقي علشان يصير زواجنا بليله وحدة . )
ردت ربى عليها وكتبت : ( ههههه بكرا امي تتصل عليكم وتعلمكم وش قررت )
%%%%%%%%%%%%%%%%%%%%%%%

يوم الجمعة ..
ام حسام كانت جالسه بالصاله وتقرا مجلة ومتحمسه .. جالسه فوق الكنب ورافعه رجلينها .. ربى جت لعند امها ...
ربى : يمه
ام حسام : امممم اصبري
ربى : طيب .........
ام حسام متحمسه مره وماتحب احد يقاطعها اذا صارت تقرا وهي متحمسه
ربى شافت امها متحمسه قامت ...
ام حسام : تعالي ....
ربى : لا شكلك مشغوله . بعدين اقول لك
ام حسام : لحظه ................
ربى حطت ايدها على خده ..
ام حسام : اها وش بغيتي تعالي اجلسي
ربى : خلصتي
ام حسام : ايه يا جبيبتي ... تعالي قولي لي وش تبين
ربى ومشبكه ايدينها : يمه .
ام حسام : هلا
ربى بحزن : يمه بقول لك شي
ام حسام : قولي يابنتي خوفتيني .. تكلمي وش فيك
ربى : لا خلاص مو لازم ....
ام حسام بغضب : تبين تلعبين باعصابي ... تكلمي وش فيك
ربى حطت ايدها على خدها واخذت نفس طويييل : يمه امممممممم
ام حسام : وشو ... وش فيييك رفعتي ضغطي
ربى بحزن : قررت
ام حسام : على ايش
ربى : على سامي
ام حسام بخوف : اييييه وش قررتي لا يكون ما تبينه
ربى : امممممممم
ام حسام : تكلمي بسرعه
ربى : يمه انااا .....................
%%%%%%%%%%%%%%%%%%%
تتوقعون ربى توافق على سامي
اذا ما وافقت وش رح تكون ردة فعل لين صديقة عمرها و
ووش رح تكون ردة فعل سامي
........................................
كل هذا وأكثر في الجزء التاسع 9 من رواية
)))أصدقاء للأبد لو يطول الأمد للكاتبة المسلمة المسالمة (((

[tottoro]

اكيد ربى ما بتوافق


بس ان شاء الله توافق

[مس جوري]

أشكرك أخيتي المسلمة المسالمة ع هذاا الطرح الرائع والمميز ...
تحياتي لكي (مس جوري )..~

[ڜوربـۃ عسڷ♥]

انا ماااقريتها بس نسختها في المفكرة وشكلهااا مرة مححمسه ويالييت تعجلسي في الروايه

[سكرية وردية]

تتوقعون ربى توافق على سامي؟ اي بتوافق
اذا ما وافقت وش رح تكون ردة فعل لين صديقة عمرها؟ عادي عندها
ووش رح تكون ردة فعل سامي؟ بينصدم و يصير عنده اكتئاب

[المسلمةالمسالمة]

الجزء التاسع 9
ام حسام بخوف : اييييه وش قررتي لا يكون ما تبينه
ربى : امممممممم
ام حسام : تكلمي بسرعه
ربى : يمه انااا .. وطمرت من مكانها .... مواااقفه
ام حسام ضربت بنتها على كتفها بخفه : ويه خوفتيني الله يهديك
ربى : ههههههههههههه .. شرايك اصلح ممثله
ام حسام : ايه .. شوي ويرتفع ضغطي
ربى : وطيب اذا رفضت وش تسوين لي
ام حسام : ازوجك غصب عنك
ربى : هههههههه
ام حسام : روحي اتصلي على ام سامي
ربى : اييييييييييش انا .. يمه عيب ما يصلح
ام حسام : طيب ما تشوفين انا تعبانه ... صوتي رايح ما رح تسمع شي
ربى : خلاص طيب خليها بعدين
ام حسام : لاااا الحين روحي اتصلي . الناس ينتظروننا
ربى : يماااه .. ما ابي اكلم
ام حسام : اسمعي الكلام وروحي اتصلي بسرعة
ربى : يووه ياليتني ما علمتك اليوم
ام حسام : يا الله
ربى : يمه انا استحي .. قولي لريما طيب تتصل
ام حسام : ريما اليوم طالعه عند اهل زوجها
ربى : مالت علي انا وحظي المنسدح
ام حسام : منسدح ولا نايم .. بسرعه يا الله روحي اتصلي
ربى : طيب
وراحت لعند التليفون واتصلت
%%%%%%%%%%%%%%%%%%%%%%%
ربى : الوو
جوري : هلا والله
ربى : السلام عليكم وحمة الله وبركاته
جوري : وعليكم السلام
ربى : وين امك ؟
جوري : وش تبين فيها
ربى : بقولها شي
جوري : وافقتي
ربى استحت : ما لك شغل .. روحي نادي امك
جوري : ترى انتي الخسرانه اذا ما وافقتي ... ما فيه بالدنيا مثل اخوي قلبه ابيض و
ربى قطعت كلامها : تعطيني امك ولا شلون
جوري : اففف ليش معصبه ..
ربى : يووووووووه
جوري : الله يعين اخوي عليك
ام سامي : جوري مين تكلمي ؟
جوري : ربى
ام سامي اخذت سماعة التليفون من جوري : هلا والله وغلا
ربى : اهلين
ام حسام : هاااه وش قررتي
ربى : امممممممم
ام حسام : موافقه ؟
ربى استحت : ايه
ام سامي بصوت عالي : كللللللللللللللللللللللوووووووووش
ربى : ههههههههههههههه
ام سامي : مبروك مقدما ... يابعد عمري
ربى : الله يبارك فيك ... معلي شامي كانت بتكلمك بس تعبانه وصوتها رايح
ام سامي : حلقها يوجعها ؟
ربى : ايه
سامي : يمه يمه يمه
ام سامي سفهته : الله يشفيها يااارب ويخليها لكم
ربى : آآآآآآآمين
سامي : يماااااااه يمه ماما مامي
ام سامي : سلميلي عليها
ربى : ان شاء الله
سامي : يماااااااااااااااااااااااه
ام سامي : هااااه وجع وش تبي ما تشوفني اكلم
سامي : مين
ام سامي : ربى
سامي : وافقت ؟
ربى تسمعهم
ام سامي : ايه وافقت مبروك مقدما
سامي صار يضحك : ههههههههه الله يبارك فيك
ام سامي : بسم الله عليك وش فيك تضحك
سامي : فرحان
ربى : يا الله سلامي للبنات
ام سامي : يوووه نسيتك ههههههه ... الله يسلمك .. مع السلامه
ربى : ههههههه مع السلامه
%%%%%%%%%%%%%%%%%%%%%%%
لين : يمه وافقت ؟
ام سامي : ايه
لين وجوري : كللللللللللللللللللللووووووووش
ابو سامي معصب : بس بس خير ان شاء الله فضحتونا عند الجيران اصواتكم يسمعها اللي بآخر الشارع .... وش فيكم
سامي : يبه ربى وافقت .
ابو سامي : مبروك
سامي : الله يبارك فيك
%%%%%%%%%%%%%%%%%%%%%%%%%
قرروا ان يوم الاثنين يجي سامي هو وابوه ويخطب رسمي ويشوف ربى
طبعا بندر أجل الملكة علشان يملك هو سامي بنفس اليوم .
تملكوا وحددوا الزواج والقصر يوم الاثنين ..
%%%%%%%%%%%%%%%%%%%%%%%%%
يوم الاثنين يوم زواج لين وبندر – وسامي وربى
القصر كان كبييييييييييير وواسع ( اكيد لانه زواجين مع بعض ) وحضر ناس كثير
لين وربى بغرفه خاصة وكل وحدة لها كوافيره
جوري تكلم الكوافيره : خلاااااص انتي صارت اختي لوحه تشكيلية
الكوافيرة متحمسه وما ردت على جوري
لين : ليش غايرة
جوري : وع على ايش اغار . بس هي تاخرت مره
لين : احسن علشان تتقن عملها
الكوافيره : سكري فمك وعينك
جوري : هههههه الله يعينك
رحاب : جوري .... تعالي
جوري : نعم
رحاب : حلو شعري
جوري : ايه حلو ... بس ما كثرتي كحل
رحاب : الكحل يسبب لي حساسيه وما احب اكثر
جوري : اها
جمانه : السلام عليكم ..... اللهم صلي على النبي ... شو الحلاوة هذي ما شاء الله .. مبروك لين مبروك ربى
لين ماردت عليها لان الكوافيره تحدد شفايفها
ربى وهي مسكره عيونها : الله يبارك فيك ... عقبالك
جمانه : آآآآآآآآآآآآآآآآآآآآآآآمين ..
جوري ضربتها : استحي على وجهك
جمانه : وش فيها عادي هذي سنه الحياة
رحاب : ما شاء الله ياجمانه شكلك يجنن . الى الان مو مصدقه انك جمانه
جمانه : هههههههه شكرا
واخيرا خلصوا من كل شي والبنات نزلوا تحت عند الناس وتفرقوا اللي راحت تسلم واللي راحت ترقص واللي راحت تجلس
زفوا لين وبعدها زفوا ربى .. كانت زفتهم هااديه وحلوه
جلسوا شوي وبعدها كل وحدة راحت مع زوجها للفندق
%%%%%%%%%%%%%%%%%%%%%%%%%
عند بندر ولين
بندر : مبروك
لين : الله يبارك فيك
طبعا بندر متفشل ومايدري وش يقول ولين ساكته طوووول الوقت
%%%%%%%%%%%%%%%%%%%%%%%%%%
عند سامي وربى
سامي مااااخذ رااحته وما استحى ابدا وجالس يستهبل على ربى
وربى ماااايته حياء .....
بدأ سامي يسأل ربى ... وربى الله العااالم بحالها المسكينه ودها تقول لسامي يااخي اركد ويكفي استهبال .. خلاص ما تقدر .. دمعت عيونها من الضحك عليه
%%%%%%%%%%%%%%%%%%%%%%%%
بعد سنه
طبعا بندر ولين وسامي وربى ساكنين بنفس الفله سامي بالدور الاول وبندر بالدور الثاني ...
لين اتصلت على ربى مثل كل يوم
لين : الووو
ربى : هلا
لين : مشغوله؟
ربى : لا
لين : فيه سامي ؟
ربى : ايه .... وانتي فيه بندر؟
لين : لا طالع ......ز عادي انزل عندكم
ربى : ايه حياك ... سامي عادي لين تجي؟
سامي جالس على الكنب ويقرا جريدة : اوووووووووه هذي ما تخلينا لحالنا يوم واحد بس .... ايه خليها تجي .
ربى : يقول عادي
لين : سمعت وش قال بس عنااااد بجي
وراحت عندها
لين : وش لونكم
ربى : الحمدلله بخير جعلك بخير
لين : اهلين سامي .. اخبارك ؟
سامي : وانتي كل يوم تسأليني عن اخباري .. الحمدلله بخير ..
لين : ههههه هذا جزاي بعد اجي اوسع صدوركم
سامي : انا ما قلت لك لا تجين ... بالعكس تعالي بس مو كل يوم
لين : بجي كل يوم وكيفي .... مو علشانك علشان صديقتي وحبيبه قلبي
سامي : وخري عن وجهي مليت منك... الا بندر وينه كل يوم يطلع
لين : لا مو كل يوم
سامي : اشوى
ربى : لين يا الله امشي نجلس هناك
سامي : ايه بتروحين وتخليني ... يحق لك جت صديقتك وانا لي الله
ربى : هههههههههه
لين : لا يهمك بس .. يتدلع عليك
سامي : بعد جايه بيتي وتفرقين بيني وبين زوجتي... يله روحوا
ربى : زعلت ؟
سامي : لا .. ما احب ازعل احد
لين : اخوي واعرفه زين.... يله امشي نجلس
ربى : يا الله
وسوالييييييييييف ما خلصت الى بآخر الليل .. وسامي مسكين من الطفش نام بمكانه
%%%%%%%%%%%%%%%%%%%%%%%
بعد اسبوعين
ربى وسامي كانوا طالعين
ولين وبندر عازمين سامي وربى على العشاء
اتصل بندر على سامي
بندر: هلا سامي كيف الحال ؟
سامي : بخير يامآآآآآل الخير
بندر : مطّول
سامي : لا انا الحين بالطريق بغيت شي ؟
بندر : وانت راجع جب معك خبز
سامي : هههههههههههه هذا وانتم اللي عازميننا ... ان شاء الله كم بندوره انا عندي
بندر : الله يسلمك ... مع السلامه
سامي : مع السلامه
%%%%%%%%%%%%%%%%%%%%%%
ربى وسامي وهم بالسيارة
ربى : وش يبغى ؟
سامي : يبغون اجيب خبز ؟
ربى : ايه
سامي : بنزل اجيب خبز ... تنزلين معي ؟
ربى : لا مو لازم ... انتظرك بس لا تتأخر
سامي : ان شاء الله باشتري الخبز وارجع بسرعة
ونزل من السياره ودخل يشتري خبز
ربى جالسة لوحدها بالسياره وتتفرج على السيارت ... سيارة رايحة وسيارة جايه
فجأة ................
شافت ولد صغير يبغى يقطع الشارع وكان فيه سيارات وصار يركض مرت سيارة مسرعة مرررة السايق ما يدري ايش يسوي ارتبك بالسواقة ولف يمين بسرعة هائلة عشان ما يتأذى الطفل وكانت السيارة شوي وبتنقلب.
بس مين كان في الجهة اليمنى؟
كانت فيه ربى داخل السيارة صدمت السيارة بسيارة سامي وصار حادث فضييع وقوي والسيارة تحطمت. وربى تحركت من من مكانها تقريبا ثلاث أمتار.وضرب رأسها بعمود الكهرب والله اعلم بحالها.
الدم ملأ المكان. والناس تجمعوا والسايق الي صدم سيارة سامي حالته حالة
طبعا سامي أو ما سمع صوت الفرامل وصوت الحادث خاف على ربى. ووجعه قلبه طلع من المخبز.بدون ما يأخذ الخبز وراح يركض وصار يلتفت يمين ويسار مثل المجنون. يدور على سيارته
السيارة تحطمت لكن ما همته وراح بسرعة وهو يركض يدور على ربى
شاف ربى طايحة والدم حولها
سامي يصرخ: ربى ربى ربى.... لاااااا وصار يبكي
سامي: ربى تكفين لا تروحين وتخليني انا ما اقدر اعيش بدونك.. ربى اصحي اصحي.
الرجال الي متجمعين حولة صاروا يبكون وتأثروا جدا من الموقفد
سامي ما يدري وش يسوي وحط بباله ان ربى خلاص ماتت.
حط يده على رأسه وجلس يبكي
جو الرجال مسكوه وبعدوه عن ربى وصاروا يهدونه.
أخيرا جت سيارة الاسعاف والشرطة
اخذوا ربى والرجل الي صدمها على المستشفى.
%%%%%%%%%%%%%%%%%%%%%%%%%%%
عند لين وبندر
بندر ولين جالسين كل واحد حاط إيده على خده وينتظرون سامي وربى على العشاء
لين جهزت العشاء وحطته على الطاولة .وكانت طابخة الأكلة التي تحبها ربى
ومسوية لسامي السلطة اللي يحبها. ومبسوطة مرة ان ربى وسامي راح يجون عندهم.
لين: بندر
بندر: هلا
لين : ما كأن سامي وربى تأخروا
بندر: إلا تأخروا مرة
لين: طيب اتصل عليهم شف ليش تأخروا
بندر: طيب
واتصل على جوال سامي.
سامي كان جالس ربى بغرفة العمليات
بندر : هلا سامي وينك متنا جوع
سامي بصوت هادئ وحزين: ألو
بندر استغرب وضاق صدره: سامي!!! وش فيك؟؟؟!!!
سامي : بندر
بندر: عيون بندر يا ولد العم
سامي: آآآه انا محتاج لك.
بندر: وش فيك؟
سامي: ربى
بندر: ايه وش صار
سامي: بغرفة العمليات
بندر: ايييييش ؟؟؟؟!!!
لين طاح قلبها من الخوف حست ان اعز انسانها لها وصديقتها فيها شي
لين: بندر وش فيك .... وش صار
بندر: دقيقة
وراح للغرفة الثانية وسكر الباب ووطى صوته علشان لين وش بتسوي إذا سمعت ان صديقتها وحبيبتها بالمستشفى
بندر: سامي أنت بأي مستشفى ؟
سامي بصوت حزين : بمستشفى ((..........)) تعال بسرعة ... وسكر الخط
بندر قام بسرعة ولبس ثوبه وطلع وهو يركض ولين تركض وراه
لين بخوف : بندر بندر لحظه
بندر : نعم
لين : وش فيك ؟؟؟ ووين تروح الحين سامي وربى بيجون ؟؟ وش صار ؟؟
بندر : بعدين بعدين مو وقته
لين دمعت عيونها وهي تبكي : بندر الله يعافيك وش فيك ؟ سامي وربى فيهم شي ؟
بندر: لا لا بس سامي عند صديقي بالمستشفى .. وانتي تعرفين سامي اكثر مني تعرفين انه يخاف ويتأثر في هذي المواقف وقال لي تعال عندي وبس لا تخافين انا شوي وارجع
ابتسم علشان يهديها لكن قلبه خااااااايف على سامي وربى
وطلع وراح لعند سامي
لين راحت لغرفتها وجلست على سريرها تفكر
%%%%%%%%%%%%%%%%%%%%%%%
في بيت ابو حسام
ابو حسام : ام حسام .. وش اخبار ربى وسامي اتصلتي عليهم اليوم
ام حسام : لا ما اتصلت عليهم
رحاب : يووووووووه اشتقت لها ..
ام حسام : روحي اتصلي عليها
رحاب ما صدقت خبر راحت تركض واتصلت على جوال ربى
ام حسام : هاااه ردت؟
رحاب : ما احد يرد
ابوحسام : اتصلي على البيت
رحاب : ان شاء الله
اتصلت ونفس الشي ما احد يرد
رحاب : يمه اتصلت 3 مرات ولا احد يرد
ام حسام : الله يستر وش فيهم
رحاب : يبه اتصل على سامي
ابو حسام : طيب
سامي شاف الرقم واحتار يرد ولا لا ... بس مارد
ام حسام / رد ؟
ايو حسام : لا
ام حسام : اتصل مره ثانيه
ابو حسام اتصل مره ثانيه واخيرا رد
سامي بصوت حزيييين : الو
ابو حسام : هلا وش لونك
سامي : .................... ساكت
ابو حسام : الو
سامي : الو
ابو حسام : وش فيك لا يكون نايم وازعجتك
سامي : لا
ابو حسام حس ان فيهم شي : عسى ما شر وش فيك .. صوتك متغير
سامي : ولا شي
ابو حسام : طيب وين ربى ؟
سامي : ....................
سكت ما يدري وش يقول ..
ابو حسام طلع من طوره : سااامي ما صارت يا اخي تكلم وش فيك لا تلعب ياعصابي
سامي : ربى
ابو حسام : ايه وش فيها
سامي : بالمستشفى
ابو حسام : اييييييش !! أي مستشفى
ام حسام ورحاب اول ما سمعوا كلمة مستشفى انهبلوا
رحاب نزلت دموعها وام حسام خاااااافت
سامي : بمستشفى ((..........)) محتاج لك يا خالي
ابو حسام : انا الحين جاي ... مع السلامه
ام حسام : وش فيك ؟؟؟ وش فيها ربى ؟
رحاب : لا يكون صار لها شي
ابو حسام : بعدين اقولكم
ام حسام: لا قول الحين
ابو حسام : ما ادري يقول انها بالمستشفى ... مع السلامه
ام حسام : لحظه خذني معك
ابو حسام : لا ما ابي احد وراح اطمنكم ان شاء الله
%%%%%%%%%%%%%%%%%%%%%%%%%
في المستشفى
بندر : هلا سامي
سامي : ..................
بندر : وينها
سامي ما يقدر يتكلم واشر على غرفه العمليات
بندر : قضاء وقدر ... خل ايمانك بربك قوي
سامي بصعوبه : لا اله الا الله .. انا لله وانا اليه راجعون
جاء ابو حسام وكان خااايف مرره : السلام عليكم .. هااه بشروا وش صار
بندر : الحين هي بغرفة العمليات
ابو حسام : طيب وش صار لهم
بندر : ما ادري ما تشوف حالة سامي .. سااااكت .. اساله يارب يجاوبك
ابو حسام : سامي وش صار عليكم ؟
سامي وبصعوبه وحزن قال لهم كل اللي صار
بعد فتره طويييييييييله
اخيرا طلع الدكتور من الغرفه
سامي : هااااه يادكتور بشر ... قول انها بصحة وعافيه ارجوك قول .. وبكى
الدكتور : .................
%%%%%%%%%%%%%%%%%%%%%%%%
تتوقعون ربى تموت !!!
وش تصير ردة فعل لين المسكينه ؟؟
كل هذا وأكثر في الجزء العاشر 10 من رواية
)))أصدقاء للأبد لو يطول الأمد للكاتبة المسلمة المسالمة (((

[سكرية وردية]

مشكورة عشانك نزلتيها يا عسل و لي رجعة بعد القراءة بإذن الله

[سكرية وردية]

رجعت و الحمد لله

التوقعات:

تتوقعون ربى تموت ؟ لا ما اعتقد لانها بطلة بالرواية

وش تصير ردة فعل لين المسكينه ؟ ما ادري بس بتصير خايفة عليها

[ڜوربـۃ عسڷ♥]

لالا لا تخليها التموووووت

[مس جوري]

لااااااااااااا ابد ما اتوقع تموت
تحياتي مس جوري