عايزة اتجوز ,,,, قصة طريفة

[وردة الحنين]

هذه قصة للكاتبة غادة عبد العال قرات موقف طريف واقعى لها فى احد المجلات وحبيت اشارككم بيه وعايزة اشوف الردوود الحلوة منكم
بسم الله نبدا

واحدة صاحبتى كانت لسة متجوزة قريب وكنت لسه حاضرة فرحها

من اسبوعين..

اتصلت عليا عشان تتطمن على سيادة حضرة سيادتى

انا بقى مسكت صاحبتى وقعدت اهزأها: ايه الصحوبية دى احنا مجوزينك ليه ؟! مش علشان تشوفيلنا فى اصحاب جوزك ولا قرايبه حد يتجوزنا !..

صحوبية دى ولا خيبة

وكل شوية صاحبتى تحاول تقاطعنى وتسكتنىوانا منطلقة زى الصاروخ..

لحد ما راحت

موقفانى بصرخة : يا بت اسكتى بقه جوزى بيسمع من السماعة التانية وعايز يتاكد انك كويسة ورقيقة عشان جايبلك عريس!

وفى لحظة اتقلبت طريقة كلامى 180 درجة وبقيت ارق من ارق واحدة فى الدنيا وانا بقول: انتى صدقتى!انا كنت بهزر معاكى..انتى عارفة انى طول عمرى رقيقة..

دا انا ارق من بنات السينما اللى طالعين اليومين دول.

واسمع صوت جوزها وهو يحاول كتم ضحكته على السماعة التانية

وصارت صاحبتى تقول وهى تصك على اسنانها: عارفة عارفة .. هوا انتى هتقوليلى !.

امهم اتفقنا على ميعاد.. ولما اقول اتفقنا على ميعاد يمكن تعدى على الرجالة بسهولة اصل اكتر حاجة حيعملها انه يستحمى( ومش دايما كمان!)

ويخلى امه تغسله القميص والبنطلون واخته تكويله الهدوم ويشغل كل اللى خلفوه عشان سعادة البيه..لكن فى بيت العروسة ( اللى المفروض انها انا )الوضع مختلف ...

هييييييييييصة.. غسيل الحيطان وتلميع الارضيات و تنظيف السجاجيد و تنظيف الستاير والشبابيك..وكل دة طبعا على راس العروسة واللى خلفوها ..

المهم جا البيه المحروس هو واهله .. لمحته وهو داخل ويا ليتنى ما شفته..ياسلاااااااااام..زى ما يكون لامم كل اللى على حبل الغسيل ولابسه على بعضه.. وبقيت متأكدة انه ماعندهمش فى البيت مرايات وان امه واخته عندهم عمى الوان.. البيه لابس

قميص اصفر وبنطلون ازرق وبلوفر اخضر

..

وفوق كل ده كله كرافته من النوع عديم الالوان يمكن كان لونها ابيض ايام الانجليز وهو وارثها عن جد جده..

قلت فى نفسى:مش مشكله بيقولوا الراجل ما يعيبهوش غير جيبه...

واهو يبقى العريس ملون زى التلفزيون الملون مشرق ومقبل على الحياة .. هو صحيح اذنيه مخاصمين راسه خالص واسنانه بيحبوا بعضهم جدا لدرجة انهم راكبين فوق بعضيهم..

بس خلقة ربنا يعنى.. المهم العقل والشخصيه .. واول ما دخل بابا راح هو واقف (اسم الله عليه مؤدب يعنى )..

وانطلقت امه تعرفه زى ما يكون فى بر نا مج مسابقات:

- الدكتور سامى .. علاج طبيعى..

- قام هو مكمل تقديم المحروسه والدته: وبقلد فنانين كمان !..

- ايه الهبل ده بأاااااااااه!!! هو احنا عاملين برنامج مواهب ولا هو مقدم على شغل فى مسرح اطفال!.. بابا عداها وقال له: آآه اهلا وسهلا اتفضلوا .. وبص لماما بصة معناها : ايه الخيبه اللى جايبينها دى !!

المشكله ان العريس انطلق يحكى عن صولاته وجولاته فى عالم التقليد والخيبه ان امه منشكحة ومبسوطة على انجازات ابنها فى الحياة

.. وفجأة بص فى الساعة وبص لبابا وقال: يا عمى .. ممكن اسأل سؤال وتجاوبنى بصراحة؟..

ابويه رد عليه بقلق وقال: ايوة يا بنى خير ان شاء الله.. قال: هو التلفزيون دة بيشتغل ولا عطلان!.. بابا فوجئ كدة وقال: بيشتغل يا بنى بيشتغل!

فجأة البيه المحترمراح قايم وفتح التلفزيون وقعد يقلب فى القنوات لحد ما جاب قناة فيها مباراة(يعنى ماتش بالعربى).

لنادى الزمالك.. وبابا وماما قاعدين مذهولين.. وبعد شوية بدأ يتحمس مع اللعب ويعلى صوته :شوووت يا عم !.. ياااه .. الحكم ده حمار ابن....(وبابا وماما قاعدين!!!).

ماما حبت تحرجه بالذوق كدة وقالت له:والله يا بنى انا مش عارفة انت ازاى بتابع الكوورة اليومين دول.. ده حتى الزمالك بقى له مده لعبه مش كويس خالص.

الواد فجأة سكت .. ولف كدة على ماما بالتصوير البطيئ... وعينيه احمرت لدرجة ان ماما خافت...

... وراح رافع صوته:لأاااااااااااااا!!..بقولك اييييييه.. الا الزمالك .... اتكلمى براحتك على اى حد..

على امى .. على ابويه..عليا انا شخصيا...لكن الزمالك لألألأ!!فاهمه... وراح باصص على امه وقايل:قومى يا ماما انا لا يمكن ادخل بيت الزمالك بيتهان فيه ابدا!!

يا بن 60فى 70!!.. بصراحة انا وقعت على الارض من كتر الضحك.. صدق اللى قال: هم يبكى وهم يضحك..

الجميل انه صاحبتى جاية تانى يوم تسألنى عن رأيى..قلت لها: اكيد انتى بتستهبلى! وحكيت لها على اللى حصل

.. لقيتها قالت: طب وايه يعنى؟؟ عادى أهم حاجة ما يعرفش انك اهلاويه!!

ولما اصريت على الرفض ..

صاحبتى دى قاطعتنى ولم تكلمنى من يوميها.. لانه ازاى ارفض عريس لقطة زى ده!!

صحيح ازاى ؟!

عايزة اشوف بقى الردوود اللى تعوضنى عن وجع ايديه آآآآه

المصدر: منتديات بنات دوت كوم

---

uhd.m hj[,. <<<< rwm 'vdtm

الموضوع الأصلي : عايزة اتجوز ,,,, قصة طريفة || القسم : سجن بنات دوت كوم || المصدر : منتديات بنات دوت كوم || كاتبة الموضوع : وردة الحنين