(( روحــــي فــــداك )) قصة حب كويتية..من تأليفي...

[عصفورة الأقصى]

مشكوورة غناتي ع الجزء الروووووووووعة..
الصرااحة استوت فيهخ أحداث رهيبة..
مشكوورة يالغلا..
ولاتطولين علينا بلييييييييييييييييييييز..

[Nootah]

مشكوووووورة أختي على البارت الأكثر من روووووووعة

وننتظر التكملة

[بنت الصحابة]

أنا تبعت قصتك من أول وهي رائعة جدا
كمليلنا نحن ننتظرك

[هدباء]

قلمي يعود لكم بعد أيام معدودة لينثر جديده بينكم

ييت لكم هالمرة و بلمح البصر ما طولت عليكم بالجزء الثالث عشر بالفصل الأول

أن شاء الله ينال على أعجابكم و ترى الجزء واااااااايد طويل

و أتمنى لكم وقت ممتع معااااه

بس نصيحة (( لمن تقرون هلجزء تشغلووون أغنية راشد الماجد بدر عشان تعيشون الجو مع عرس ريم و جاسم أوب أوب حرقت عليكم المفجأة ان العرس بهالجزء بس يلا أن شاء الله يعجبكم الجزء و مثل ما وصيتكم سمعوها مع أجواء الجزء والله رح تعيشون الجو مثل ما عشته :013: )) ....

تـــــــــــــــــــــــــــــــابــــــــــــــــ ــــــــع

[هدباء]

..".. الجزء الثالث عشر .."..

(( الفصل الأول ))

مركون بين البحر والبيت وحداني....ابني لروحي أمل وجروحي اتهده

وأمر قبل الغروب ارتب أحزاني....اطوي شراع الهوى وأنوحوأمده

لايابحر منهو اللي ناسي الثانــي....أنا أو اللي هجر شاطيك منمـــــده

أرقدة ريم و دموعها على خدينها ما كانت تنتظر من يمسحهم بل كانت تنتظر رحمة ربها على حالها .. صعب ننجبر على شي ما نبيه ....

جاسم إلي كان كلام ريم بباله و مب عارف اشلون رح يبدي معاها اهو بدى بالخطوة و لازم يكملها و باجر ريم رح تكون وياه و قريبة منه لازم يوفي بوعده لها و يحقق حلم أبوه و يترك البسمة على محيا ريم دوم لمن تكون وياه

كل هذا صعب مع ريم و لكن ماهو عيب لو حاول

مضى ليل وهو يحمل معاه أسرار و ذكريات و لحظات فيها بجينا و فيها ضحكنا فيها زعلنا و فيها رضينا فيها لمنا و عاتبنا و فيها عذرنا و سامحنا

حملها ليسري بها للحظاتنا الماضية و يجمعها بين أغيومه و نور القمر فيه

و أشرق صباح أبنوره يهطل على الدنيا بمحياه لينورها بشمسه

ببيت أبو طلال صحى ناصر من ارقاده ناظرها الساعة 8 الصبح قام من افراشه و غسل ويهه و بدل طلع بينزل لمح باب غرفة ريم و تذكر حالها امبارح ما يسر الخاطر .. تحرك لغرفت ريم و فتح الباب بهدوء ما يبي يزعجها اذا كانت للحين راقدة و ما صحت .. طل عليها لقاها عاطته ظهرها بالرقاد سكر الباب و تحرك لناحيتها لقاها راقدة و يدها تحت خدها و حذالها اوراق و قلم

حمل الأوراق و رفعهم ليقرى المكتوب فيهم

(( صفحة من مذكراتي .. بعنوان ليلة مضت بأقسى العذاب مر فيني .. يا صفحاتي اليوم جرحوني و جبروني على الي ما بغيته وشلون بقدر اعيش بدنيا ما ابيها و اكمل حياتي مع انسان ما احبه كثر ما اكرهه .. سبب اكثر أجروحي و حرمني من حلمي .. معقولة هذا جزاتي لأني عشت بدنيا ما ظلمت فيها لا صغير و لا كبير و لكن ما اطلب الة شي واحد و ابيك انت يا جاسم تسمعني فيه اذا ادنيا و قدري قسوا علي انت لا تقسى علي أبدا كافي جبروني عليك لا تجرحني معاك دامني انجبرت عليك )) ....

رفع عينه يناظرها و تألم قلبه عليها وده بس لو يقدر يسوي لها شي بس الغريب قاعد يشوف ان ريم لجاسم اكثر اثنين يناسبون بعض مثل أعناد بعض مثل أصرار بعض مثل طيبة بعض و كأن القدر راسمهم لبعض من الصغر

نزل الورقة و باس ريم على جبينها و طلعت من غرفتها و نزل لطابق الأول

.................................................. .................................................. .

ببيت أبو وليد في الصبح على طاولة الطعام بالفطور

ابو وليد :_ يبه جاسم حنا امس حددنا كل شي و اتفقنا على كل شي و بأذن الله أسبوع الياي رح يكون العقد نفس ليلة الزواج .

جاسم :_ أنت تامر يبه بس ان شاء الله كل شي يناسب ريم .

نوف :_ يا عيني من الحين بدينا بالمحاتات عليها .

ام وليد :_ هشي مو محاتات من حق العروس يكون الوقت يناسبها و يكفيها لتسوي كل اشغالها .

محمد :_ ويييييييي وييييييييي سكتوها الملقوفة .

نوف :_ مالت عليك اسكت احسن لك .

وليد يهمس لبدور :_ شنو عمري و انتي متى بتزهبين حالج .

بدور :_ توها الناس و انا ما رح اخذ لي وايييد باخذ لي جلابية واسعة الحمال والله مب مخليني اجوف حالي .

وليد :_ بالعكس الحمال مخليج اشمتنج جذي حلوة مب عووود اشضعفج .

بدور :_ تشغمر علي لكن اصبر لي بوريك الضعف لمن اولد .

وليد :_ لا خلج جذي دبة اذا بتضعفين من تولدين بشري بثالث .

بدور و اهي تناظره بأستحقار .. وليد :_ يا ويل قلبي على الي عصبوا فديتهم انا.

حقرته بدور و كملت فطورها

جاسم :_ حددتوا في وين العرس .

محمد :_ يا اخي هذا عرسك مب عرس ابوي .

جاسم :_ أي بس لمن يتفقون كنت انا مع ريم ما دريت ابشي .

ابو وليد :_ حددناه بالفندق نفسه الي صار فيه عرس وليد و كل شي اتفقنا عليه .

جاسم :_ اهااا اوكي باجر تجهيزات العروس الحين .

ابو وليد :_ هذا هو بس الحين خل بنت عمك على راحتها و ليمن تكمل و بعدين يصير كل الخير على اسبوع الياي .

.................................................. ......................................

هناء اليوم صحت امبجر و ازهبت لتروح تجوف ريم قلبها مب مرتاح طول ليل و اهي تحاتيها البست و اطلعت بسيارتها .. لمحها اخوها فهد وهو بيركب سيارته و ترحك لها ...

فهد :_ صباح الخير .

هناء و اهي تحط جنطتها بالكرسي الي حذالها و الباب مفتوح :_ صباح انور فهد.

فهد :_ على وين من الصبح .

هناء :_ بروح لريم و هم لازم اكون وياها بأجهاز عرسها .

فهد الي انصدم وهو يسمع الكلمة من اخته :_ أجهاز شنو .

هناء :_ اشفيك فهد اقول لك اجهاز عرسها .

فهد بصدمة :_ أي الله يهنيها من رح تتزوج .

هناء :_ ولد عمها جاسم .

فهد يتذكر جاسم بالمستشفى لمن طاح ناصر وهو لي جاف ناصر و نقله للمستشفى .. تذكر حلاه ميز الانسجام بينه و بين ريم و تحسر كان يحسب ان ريم مب لأحد يمكن تكون له و لكن باين نصيبها مربوط بغيري .

هناء :_ فهد وين شردت اقول لك بمشي انا توصيني على شي .

فهد :_ ها أي أي لالا و لا شي سلامتج .

هناء :_ الله يسلمك في أمان الله .

فهد :_ بحفظه ورعايته .

مشت هناء و تركت فهد مصدوم البنت الي لمحها بذاك الجمال رح تكون ملك لواحد .. يمكن تحسر انها ماهب من نصيبه ولكن ما عشقها عشق الجنون الي يتركه يجن عليها فدعا لها بالتوفيق و تحرك لسيارته ....

.................................................. ...........................................

مضت الأيام على تعب جاسم لتجهيزات للعرس و الحجوزات و فوق هذا ترتيب سفرهم الي رح يكون يوم ثاني من العرس على الصبح الساعة 4 .. و فوق كل هذا المفاجأة الي محضرها لريم و رح تكون صدمة لها تعبته بالتجهيز لها أكثر .. ما رح افسد على بطلنا و نترك المفاجأة بوقتها يكون أحلى

أما ريم فكانت حالتها انفسية ما تساعدها تكون قدها و تتحمل تجهيزاتها فهناء كانت معاها بكل مشاويرها و خطواتها و ما تركتها لمن كملت معاها كل اشغالها كل شي شرته ريم قليل كانت الاشياء على ذوقها اما الباجي فكان على ذوق هناء و خواتها لولوه و شيخة

ليمن وصل اخر يوم من التجهيزات كان بنسبة لريم و جاسم و حتى يمكن الأهل في أستعداداتهم لهزواج الي الكل كان منتظره على احر من الجمر

................................................

انزلوا من السيارة و ريم هلالت التعب محاوطة عينها تحركوا لداخل المحل و ريم اتعب يحويها من كل صوب .. ادخلوا افخم المحلات لفساتين العرائس لحجز فستان ريم .. لليلة باجر بأذن الله

و هلمرة كانت بس هناء مع ريم و لولوه و شيخة تعذروا فراحوا بمشوارهم لفساتينهم ياخذونهم لانهم جهزوا

هناء و اهي تناظر ريم :_ ريووم حبيبتي اشفيج .

ريم :_ تعبانة هنوي تكفين خلي هذا لباجر .

هناء :_ شنو لباجر .. حبيبتي باجر عرسج اليوم اخر يوم نكمل الشغل و هذا اخر محل يلا خلصينا و اختاري الفستان .

هناء :_ انتي اختاريه انا ما اقدر اركز .

هناء :_ صج والله لا تزوديها ريووم يلا هذا فستانج انتي الي لازم تختارينه يلا جدامي .

.................................................. ..........

طلع جاسم من البنك و ركب سيارته .. قبل لا يشغل السياة رن تلفونه و رفعه

جاسم :_ الو .

زياد :_ جسووم وينك .

جاسم :_ كنت بالبنك .. ها شنو أكدت على حجز الفندق .

زياد :_ أي من الصبح أكدت عليهم و قالوا لي كل شي على حسب الطلب جاهز .

جاسم :_ أوكي زياد أنا الحين بمر أخذ أهدومي و بكون بعدين بالمزرعة ابيك تييني .

زياد:_ انت للحين ترقد بالمزرعة .

جاسم :_ لا بس باخذ اغراضي منها .

زياد :_ اوكي نلتقي بعد اشوي على خير .

جاسم :_ اوكييي في أمان الله .

زياد :_ بحفظه ورعايته .

………………………………………………………………………………………

على الساعة 6 المغرب أوصلت ريم بيتهم

ريم بسيارة هناء :_ هنوي نزلي لج اشوي معاي .

هناء :_ لا شنو انزل من الصبح معاج خليني ارد البيت اريح لي اشوي .

ريم :_ على راحتج .

هناء تسم يد ريم :_ ريووم انتي للحينج زعلانة على الي يصير لج .

ريم تناظرها :_ ليش بتفكرين في يوم احد يرضى على شي ما يحبه .

هناء :_ ريوم عمري هذا قسمة و نصيب و هذا المكتوب لج ابي اجوفج ريم الي اعرفها قوية و ما تهاب الصعوبات بهدنيا لازم اكو اشياء تخلينا نوقع و يمكن نفشل و نخسر و لكن القوي فينا من يواجه هشي كله بقوته و صبره و أمله بالله .

ريم و اهي تبتسم :_ لا تخافين علي انا قدها بس هنوي اسموحة استأذن احس روحي من التعب بطيح .

تـــــــــــــــــــــــــــــــــــــابــــــــــ ــــــــــــــــــــــــــع

[هدباء]

هناء إلي لاحظت التعب بأثره على محيا ريم :_ حبيبتي انزلج لو تقدرين تروحين لحالج .

ريم :_ لا مو لهني وصلت بس انا يا هناء تعب نفسيتي اكثر من تعب جسمي بس لا تحاتيني .

هناء :_ ربي وياج .

ريم :_ و معاج يلا في أمان الله .

هناء :_ في حفظه و رعايته .

انزلت ريم و اهي تمشي بتعبها و تزف الحزن معاها .. بقت تناظرها هناء ليمن ادخلت بيتهم و تحركت بسيارتها .. اول ما ادخلت ريم بيتهم تحركت لدري بتصعد التقت بطلال الي انتبه لتعب يحوي ويها

طلال :_ حبيبتي ريووم اشفيج اشفيه ويهج باين عليج تعبانة .

ريم ترمي بحالها على صدر اخوها :_ طلال تعبااانة حدي ما اقدر حتى اصعد لفوق .

طلال يلمها له بذراعينه :_ حبيبتي اشفيج جذي .

ريم وسط تعبها المعت اعيونها بدموعها الدافية :_ حبيبي ما فيني الة كل الخير بس جسمي مب قادر يشيلني من التعب اتركني بريح لي اهني بصالة اشوي .

طلال :_ زين تعالي انا بوديج .

مشاها معاه ليمن أوصلت لصالة و تركها ترتاح على كنبة طويلة .. و اخذ منها ارغراضها و تركها ترتاح .. ريم اول ما رمت عمرها سكرة عينها و جسمها كان مثل جسم الميت من التعب ما كانت تملك السيطرة تلم نفسها و كان الهدوء الملائكي يحاوطها و محياها يزهي بذاك النور لبياض بشرتها و رموش عينها الطوال الي مرتخين براحة ممتعة لويها و يدها الناعمة الي كانت تحت خدها و خصلات من شعرها متدلية على جبينها و قريبة من عينها .. ابتسم طلال على شكل ريم لحلاها و تقرب رفع شعرها عن عينها و باسها على جبينها و تحسسها لقاها ما تدري بعمرها و مب من المعقولة ترقد اهني تقرب اكثر و حملها بهدوء و اهي من التعب ما حست على حالها و رمت براسها على ذراعينه رفع راسها لصدره و حملها لفوق ريحها على سريرها و سكر باب غرفتها و تركها ترتاح و تهدأ نفسيتها باين على ريم اليوم تعبها تعب نفسي و لكن طيبتها تخبي هشي و هذا طبعها

أنقضى هليل على كل بيت بفرحة وهم ينتظرون بزوغ فجر يوم ثاني و يشاهدون سحر ذاك الفرح يجتاحهم و يجمع احلى شملين

ببيت ابو مشعل زياد كان توه راد من المزرعة اول ما دخل تلقته امه

ام مشعل :_ يمه زياد وينك .

زياد :_ كنت مع جاسم و تجهيزاته لا تحاتيني بس ابي اريح لي اشوي .

ام مشعل :_ يعطيك القوة يا يمه بس لا تهد حيلك جذي بالهداوة على حالك .

زياد وهو يبوس راس امه :_ يمه تعب الغالي راحة هذا ولد عمي و رفيج عمري كله ماكو تعب علشانه .

ام مشعل :_ و انت قلتها يا يمه زين اشلونه شخباره اهو .

زياد :_ الحمدالله ما يشكي باس بس تجهيزات لافة له راسه و متعبته بس يلا بتمر بلمح البصر من دون ما نحس .

ام مشعل :_ زين يمه اصعد ريح لك احسك من التعب بتطيح علي .

زياد :_ و انتي قلتيها يا يمه .

تحرك زياد وصعد لفوق وين ما كانوا ملاك و مروة كل منهم تجرب فستانها لليلة باجر بأذن الله

أول ما صعد لمح باب غرفت مروة مفتووح .. تحرك لهم و فج الباب عليهم و تم يناظرهم كل وحدة برونق فستانها الروعة

زياد :_ يااااااااااااااااااااي شو هلحلا .

مروة بدلع :_ ادري اني حلوة ما يحتاج تمدح .

زياد وهو يتغشمر :_ دام جذي عيل انا بعد بروح اتزوج جان اجوف حرمتي بفستان تخبلني .

ملاك :_ هههههه زيووود ليكون عندك سوالف .

زياد بنكران :_ لالا اشفيكم قاعد اتغشمر معاكم زين اخليكم بروح ارقد حدي تعبان .

مروة :_ وشلونه معرسنا .

زياد :_ يسلم عليج يلا سي يووو .

و سكر الباب عليهم و تحرك لغرفته .. مروة و اهي تقعد على سريرها :_ والله ودي طلال يجوفني بهلحلا .

ملاك :_ اقوووول بلا احلامج الوردية هذي قومي زين نكمل لبس و نجوف هذي اخر ابروفة لنا .

مروة و اهي تقط بعمرها على سريرها :_ تصدقييييين ملاك احس ريم و جاسم ثنائي فيه انسجام روووعة و تقولين الله كاتبهم لبعض .

ملاك :_ مي تو هم انا احسهم جذي الله يهنيهم بأذن الله .

.................................................. .................................................. ...

وصل جاسم لبيتهم وهو مليان باغراضه بلي بالمزرعة وهو معاه دشداشته الي زهبت و غترته اليديدة و عقاله و البشت الي شراه و باجي اغراضه للعرس .. اول ما دخل لقته نوف :_ هلااااااااا بمعرسنا عطني عنك .

جاسم :_ يالله احس روحي بموت من التعب .

نوف :_ اسم الله عليك بس انت متعب حالك يلا حبيبي تعال زين مزهبة لك كل شي انا فوق بدارك و اليوم يابوا غرفة نومك اليديدة .

جاسم :_ وصلت من امتى ؟

نوف :_ اليوم العصر و وليد و محمد تكفلوا بكل شي تعال اوريك اياها و انا نسقت لك كل شي و محمد و وليد اهم طبعاً من اشتغلوا فديتهم اتعبوا .

جاسم :_ اسم الله عليهم من التعب زين يلا خلينا نصعد متحمس اشوفها .

نوف :_ بس ما رح تحلى الة بصحابها .

جاسم :_ نويفوووه يوزي اقول لج .

نوف :_ زين زين ذبحتنا .

صعدوا لفوق و كان الكل راقدين .. و اول ما دخل غرفته جاسم و لقى الديكور اليديد الغرفة انهبل من حلاها و تم يناظرها و يتعرف على جزء جزء منها و كأنها عالم ثاني مب حجرته إلي متعود عليها

جاسم وهو يصفر :_ وااااااااااااااااااااااااااااااو تينن .

نوف :_ افا عليك ذوق اختك اشلون ما تطلع تينن .. تعال زين بوريك غرفة اتبديل و الحمام اشلون نسقناه ...

و تم جاسم يلف بحجرته مع نوف و هو مندهش من حلاها ليمن استراح على سريره اليديد

جاسم :_ واايد عود السرير .

نوف :_ عشان لمن تتزاعلون يصير في مجال تتباعدون عن بعض .

جاسم يحمل المخدة الي يمه و يرميها على نوف

نوف :_ اااااااااي يا انذل قاعدة اتغشمر معاك اشفيك .

جاسم :_ عشان ما تتليقفين .

نوف :_ زين جسوم ورني بشتك .

جاسم :_ شنو لالا عمري خليها باجر تجوفينه علي يا حليلاتي .

نوف :_ وااااااااااااي لا تخبلني و حذالك ريمووه القردة اشحلاتها واااااااااااااااي والله بيغمى علي من حلاكم .

جاسم :_ قلتي ريمووو شنوو .

نوف :_ هههههه اي اي قلت ريموو الحلوة .

جاسم :_ والله بقص اذنج لمن اسحبها على هلحجي الي تقطينه .. سمعيني زين و حطي بمعلومج الي تتكلمين عنها مرتي .

نوف :_ للحين ما صارت مرتك باجر دافع عنها زيييييين .

جاسم :_ اقول قومي طلعي لا تعصبيني انا حدي تعبااان .

نوف :_ طاع هذا قلنا بنسهر وياه نوسه ويودع اخر ليلة من ليالي العزوبية قام و طردنا مالت عليك .

جاسم :_ اودع اعزوبيتي مع رياييل مب حريم اقول وينه حمود .

نوف :_ للحينه برة البيت .

و يقطع عليهم طق الباب .. جاسم :_ تفضل .

محمد وهو يدخل :_ من وكلك تتحجى انا بتفضل من دون ما تقول .

جاسم :_ عيل برة يلا برة .

محمد :_ لا من صجك اقول يلا خلنا نسهر و نويفوووه قومي سوي لنا شي ناكله والله ضاربة براسي سهرة لين الصبح بعد هذي اخر ليلة لجسوم معانا و من باجر مع حبيبة القلب .

جاسم :_ ها ها تبي بالمخدة الثانية انت .

محمد :_ لالا الثانية لريم و الاولة لك يا ويل قلبي عليك اقول اشرب لك باجر حبة لا تزيد تروح فيها بعدين بنت العم معاك .

جاسم :_ صج والله اقول بلا هرجك هذا .

.........…………………………………………………………………………………………..

ببيت ابو طلال وين ما كانت ريم من التعب للحين راقدة و الساعة 2 في اليل و اهي راقدة من المغرب .. تقلبت على فراشها و صحت و لقت الساعة 2 في اليل .. قامت على حيلها و لمن ارفعت راسها لقت غرفتها مليانة من الأغراض و الأجياس و كان حتى سلات من الحلويات و من أكسسوارات تتوزع على المعازيم موجودة بغرفتها المعت عينها بالدموع و تذكرت جاسم و حلاه لمن ياها باليلى الي تقدم فيها لها .. مسحت دموعها و قامت تبدلاهدومها دخلت غرفة اتبديل تبعها لقت فستان عرسها موجود و مغلف بالجيس الشفاف و زاهب و حذاله صندلها الأبيض و من فوقه الطرحة الي مليانا من قطع التطريز بالون الأبيض الرووووووووووعة .. قعدة على الارض و بدت تبجي .. ليتها تحس بحلا هلفستان .. تمنت بس لو تحس بفرحتها لمن تلبس هالفستان و الطرحة و تحمل بوكيه الورد تبعها .. رفعت يدها بتمسح دموعها تمت تتأمل بيدها إلي كانت روعة بنقوشات الحنى الروعة عليها .. قامت بدلت و اطلعت من غرفتها و راحت لغرفة عمها ناصر .. سمعت حس فيها .. فطقت الباب .. ناصر الي كان سهران و الموسيقى شغالة حذاله فز قلبه لمن سمع الباب ينطق .. فقام و تحرك لمن فتح الباب لقاها ريم ...

ناصر :_ ريم ؟؟ شمصحيج بهالوقت .

ريم :_ ما ياني نوم قلت ايي ارقد معاك اليلة اخر ليلة اكون بوسط هالبيت و مع من يحبني و يداريني باجر روح اكون بغربتي مع الي ما تمنيته تكفى عمي لمني لصدرك ما ابي احس بالخوف .

ناصر الي نزلت ادموعه :_ افااا عليج يا ريم ليش تقولين جذي جاسم بيحطج بعيونه و ما رح يتركج تحسين بالغربة دامج معاه .

ريم :_ انت تقول جذي بس انا وشلون اقدر احس بالأمان و انا مع انسان ما يفهمني و لا في يوم تمنيته و حبيته من قلبي .

ناصر :_ ربج كريم تعالي زين خلينا نرقد اليلة مع بعض .

ادخلت ريم و ارقدت مع عمها الي كان اكثر من يحس فيها بهالبيت و تمت بحظنه لتودع الأمان الي تعيشه طول عمرها و تستقبل حيات الغربة اليديدة عليها و قلبها من الخوف يرتعش

مضت اخر ليلة و جاسم و ريم كل منهم بعيد عن بعض و بقى هليل يخش بمحياه و ظلمته دموع و لحظات سهر و يخبيها و يتركها من صندوق ماضيه

مر الوقت بلمح البصر و اشرق النور على يوم كل من عايلة بن فارس كان ينتظره

ففي كل بيت اليوم الأزعاج يعمر المكان و لكن وسط هذا الفرح يجتاحهم

ريم الي صحت و لقت للحين اهي على سرير عمها تمت مسكرة عينها من نور الشمس الساطع .. بهالوقت دخل عمها عليها

ناصر :_ ريووووووووم يلا قومي اصحي وراااج شغل اشكثر .

ريم و اهي تفتح عينها :_ عميييييي خلني ارقد اشوي .

ناصر وهو يروح لها و يشيل عنها للحاف :_ ماكو .

ريم :_ مزعج .

ناصر :_ عليج .. زين سمعيني انا حاب اقولج شي و لازم تسمعيني .

ريم :_ اوكي تفضل .

ناصر :_ لالا يا عمري قومي صحصحي لي اشوي مب مسكرة عينج و تسمعيني و تردين تاخذينها ارقاد .

فتحت عينها ريم :_ كاني فتحت عيني يلا تحجى .

ناصر وهو يمسك يد ريم :_ ريووم انا عمج و من واجبي اوقف معاج بمثل هالوقت انتي كبرتي و كاهو اليلة رح تكونين عروس شحلاج و زينج .. يمكن الشي الي انتي رح تخطينه مجبورة عليه ولكن سمعيني زين .. الله وحده العالم شنو هزواج رح يكون أثره عليج و على جاسم .. فأبيج يا ريم تكونين ريم الطيبة القوية الصابرة الي انا اعرفها الي ما تعرف انها تيأس بيوم أو تترك لدموعها تضعفها .. ابيج ريم الي انا ربيتها و حبيتها .. توعديني توكنين انتي ريم الي حبيتها من قلبي و ربيتها و حطيتها بعيوني و اكثر .

ريم و اهي تلم عمها :_ يا بعد قلبي يا عمي والله بتبجيني .

ناصر وهو يلمها له اكثر :_ لالا ما ابيج تبجين اشقلنا يلا ابي وعد .

ريم و اهي تتبعد عن عمها و تمد يدها له :_ و هذا وعدي .

تـــــــــــــــــــــــــــابــــــــــــــــــــ ـــــــع

[هدباء]

ناصر يمسك يد ريم :_ وعد ؟

ريم ببتسامة تركت للفرح يعمر بقلب ناصر :_ وعد .

ناصر :_ طول العمر ؟

ريم :_ طوووووووووول العمر .

ناصر :_ و إلة رح .

ريم :_ تذبحني ههههههههه .

ناصر :_ هههههههه قص بيدي قبل لا اذبحج و الحين يلا قومي على حيلج و ابيج من الحين تكونين قدها و تبدين بتزهيباتج لاني سمعت ان لولوووو تقول موعدج لصالون على الساعة 1 الظهر .

ريم :_ اي لاني عروس يبوني اروح امبجر .

ناصر :_ بس ها حذريهم لا يطلعونج وااايد حلوة قلبي انا ما يقدر على الحلا الزاايد انتي جذي و ذابحتني بعد زوود لالا مستحيل .

ريم :_ ههههههه جذااب عووود اي اي دز من هالحجي يلا عن اذنك بروح داري و حشتني .

ناصر :_ لا تنسين ودعيها .

ريم :_ يلا لا تبجيني الحين بااااي .

ناصر :_ بااي .

.................................................. .................................................. .....

جاسم الي كان راقد و حذاله محمد و نوف حذال محمد كانوا كلهم على سرير غرفة نوم جاسم اليديدة راقدين

دخل وليد يحسب جاسم لحاله و تفجأ لمن لقى الشعب رايحينها رقاد هذول اكيد الخونة سهرانين و لا اعزموني امبارح يصبرون لي

و يطلع و يصفق الباب بقوة و كلهم يفزعون

جاسم :_ سهالأزعاج حمودوووووه يووووووووز .

محمد :_ بلا هرجك انا حذالك اكيد نويفوووه الوسة تموت بس تخرب ارقاد احد .

نوف و اهي تاخذ راس محمد تحطه بالمخدة :_ انا الوسة يا الخسيس كاني اهني هذا وليدوه انذل اكيد عصب لمن ما عزمناه على السهرة .

محمد :_ اوهووووو و مرته شتسوي يعني يتركها لحالها .

جاسم :_ احين بلا هذرتكم زين والله صاحانا وراي شغل اشكثر .

و كل منهم قام على شغله نوف قامت لدارها و محمد بالمثل ليبدل و ينزل يفطر و يروح لمحل الكوشة ويكون وياهم بالترتيبات لنقل الكوشة للفندق فهذا اشي كان مكلف فيه محمد و رح يطلع على طلبية المخبز من البوفيه و الكتووو و يمر على محل الديجي تبع الصوتيات و الى اخره من مشاوير

اختلت الدار عليه جاسم و بقى لحاله يناظرها يناظر فخامتها و جمالها و تناسق الأثاث فيها كانت ناعمة واااايد و السرير ما كان رفيييع كان بالعكس مستواه مرييح و واسع و فرشه كان بلون العنابي البنفسجي القريب من لون الحمورة

و الستاير كانت من المخمل بلون البيج و اكسسوارات الباجي من كنبات و المنظرة و الكبت و الديرس كله منسق و بألوان حلوووة

وطى راسه و ابتسم لانة ريم تستاهل اكثر من هذا تستاهل قلبه و بجذي يكفيها بس قلبه و ما رح تطلب الزود

و لكن هذا برأي جاسم هل ريم تطلب قلبه ام رحمته عليها

قام تحرك و بدل و نزل فطر على السريع و مشى لمشاويره و محمد بالمثل

اما الحريم نوف و بدور كانوا بتزهيباتهم الخاصة

مر الصبح بلمح البصر و كل منا لاهي بجهيزاته .. ريم من التعب مب عارفة شتخلي و شتسوي رتبت كل غرفتها العفسة و فتحت اجناطها تحط اهدومها على خبر ناصر لها بان سفر يكون اليلة الساعة اربع الفجر .. فلازم تكون مستعدة له .. تعبت من الترتيب و صار مخها ما يركز فدقة على هناء

هناء :_ الوو .

ريم :_ هنووووي مشغولة .

هناء :_ توني مخلصة يبت فستاني و زهبت كل اغراضي انتي ها كملتي شغلج.

ريم :_ و هذا الي ابيج فيه تعبت تعالي لي و ساعديني شيخوه و لولوووه مع امي بالتجهيز .

هناء :_ و لا يهمج مسافة الطريج و اكون عندج يلا خليني اقوم البس الحين .

ريم :_ اوكي لا تصيفين .

هناء :_ من عيوني باي .

ريم :_ باي .

.................................................. ...............................................

بالرميثية وين ما كان بيت ابو فيصل على اتم استعداد و كل منهم زاهب

نواف :_ مريوووووووووم شهوووووووود لا تأخرونا .

فيصل :_ لا تصرخ احين بيون اشعليك منهم .

نواف :_ والله ذهول يبي لهم ذبح صج لين قالوا لك الحريم بلوة .

مريم من ورا نواف :_ شنو شنو عيد كلامك .

نواف :_ ها و لا شي كنت اتكلم مع فيصل شكوا انتي تتليقفين .

فيصل :_ ههههههههههه خايف تاكلها زف اقول يلا مشينا .

و اركبوا كلهم ابو فيصل و ام فيصل بسيارة العايلة و تجدموا بالطريج للجهراء و مريم و شهد مع فيصل و نواف بسيارة نواف

تحركوا من الصبح عشان يكونون بالوقت المناسب بالجهراء و يقدرون شهد و مريم يكونون مع بنات خوالهم بروحة الصالون مع العروس

.................................................. .................................................

ببيت ابو وليد وين ما كان وليد و بدور زاهبين .. على أوامر بدور تبي تروح تييب جلابيتها عشان على الظهر تكون زاهبة و تروح مع نوف الصالون

وليد :_ بدور بسرعة .

بدور :_ زين زين اشفيك لا تستعيلني جذي .

وليد :_ شسوي ودي اجوفج قبل الكل بحلاج .

بدور :_ وليد اذا بتبدي لي .

وليد يقاطعها :_ زين زين خلاص سكتنا .

بدور بعد ما لبست تقربت من وليد و مسكت يده .. تم يناظرها

بدور :_ ابيك دوم حذالي لانة انا و ولدي وبنتي محتاجيمك دوم و بلياك ما اعيش سامعني .

وليد :_ لا تخليني اتهور .. و انا من دونكم ما اقدر اجوف هدنيا و الناس يلا مشينا.

بدور :_ اكيد .

و طلعوا من غرفتهم و تحركوا لطابق الاول و اطلعوا لسيارتهم و تحركوا

طول السيارة بدور كانت تناظر الدريشة و بالها شارد

و يفزعها وليد بمسكته لها

وليد :_ اشلون تركتي يدي و انتي تبيني دوم احذالج .

بدور :_ يمكن اتركها و لكن قلبي عمره ما يتركك .

وليد :_ بدوووور اشك انج شاربة لج شي اليوم .

بدور :_ ههههههههه الي يجابلك اشتبي يصير فيه .

وليد :_ ياربي شكلي انا الي بتزوج اليوم بدال جسووم .

بدور :_ ههههههههههه يا حليلاته جاسم فرحان تصدق عاد احس انه اهو و ريم متناسبين .

وليد :_ الله يهنيهم برغم عارف بانهم مجبورين .

بدور :_ هذا الكلام الحين باجر لمن يعاشورن بعض بكل لحظة لابد يجي اليوم الي تجوفهم ما ودهم يفارقون بعض .

وليد :_ الله يسمع منج .

بدور :_ بس تصدق احس ريم مثلي وايد لمن اقعد معاها احسها اقريبة مني وايد تفهمني و افهمها يا حليلاتها طيبة واييييد و حبوبة .

وليد :_ اي والله هريم كانت فخر بنسبة لابوي العود الله يرحمه .

بدور :_ هههههه كانا دوم نتحدى نكون بمرتبة الشرف عند ابوي العود لكن عمرنا ما وصلناها و وصلنا جاسم عند امي العودة .

وليد :_ ههههههههههههه كنت اقومها امطاقق مع جسوم لمن اغار منه .

بدور :_ ههههههههه هلكثر تغار توني ادري .

وليد :_ ههههههههههههه انا اموت من الغيرة انتي بس جربي تقربين من غيرتي و بتلقين .

بدور :_ لالا كفاني منها و من شرها ما ابي .

مر الوقت على سوالفهم و لا حسوا ووصلوا للمحل الي كانت بدور مسوية جلابيتها عندهم

نزلوا و وليد كان معاها و متشابكين اليدين و ادخلوا المحل .. و توجهت بدور لعند كونتر الاستقبال

بدور :_ لو سمحتي بغيت أسأل عن الفستان اذا زاهب .

وليد يقرصها :_ اشفستانه .

بدور :_ اصبر اشوي .

البنت :_ اكيد ثواني اييبه لج و عندج مجال تجربينه بغرف اتبديل .

بدور :_ ان شاء الله بس بالأول اجوفه .

وليد :_ بدوور اشفستانه ليش ما قلتي لي .

بدور :_ ليش مو حلوة المفاجأة .

وليد وهو يضحك و يناظرها :_ صج انج راعية سوااالف .

بدور :_ ههههه الحين بلبسه و رح تجوفني فيه .

وليد :_ لا جذي بتسوين فيني شي جدام الناس .

البنت :_ لو سمحتي هذا الفستان زاهب .

وليد وهو يناظره مو معقول الون الي احبه ....... احمر .......

بدور و اهي تناظر وليد :_ وين اجربه لو سمحتي .

البنت :_ على يمينج اكو غرف اتبديل .

بدور :_ مشكورة .

البنت :_ العفو .

بدور تناظر وليد :_ يلا .

وليد :_ قسم بالله بذبحج على سواتج .

بدور :_ هههههههههههه تسويها .

وليد :_ ياليت اقدر .

و تحركوا لغرف اتبديل وقف ينتظرها برة و اهي ادخلت تلبسه كان مناسب لها ما كان مفصل بطنها فكان المكان الظاغط الة تحت صدرها و من بعد يكون الفستان طايح و كان بالون الاحمر و كان حركته روعة بالوردة الي على جنب و مميز برفعته الناعمة لمن البسته سوة المسكول لوليد عشان ايي يجوفها

وليد ين لمن لقى المسكول و تحرك لها

بدور و اهي واقفة .. دخل عليها وليد تم يناظرها :_ يا عيييييييييييينييييييييييييييي عاد جذي ما اقدر اشحلاتج بدووور فيه و مناسبج .

بدور :_ متأكد حلوو ؟

وليد :_ لا يوصف .

بدور :_ لا صج لا تخليني اصدق عمري جذي .

وليد :_ والله قاعد اقول لج الصج و الصراحة تسمحين لي المج .

بدور :_ ما ادري .

وليد :_ مالي دخل بسوي الي ابيه .

بدور :_ لا وليد عيب حنا بمحل عالم و ناس .

وليد :_ من قالج تسوين لي جذي تحملي .

بدور الي كانت تناظر حلا عيون وليد اشلون تلمع ما نطرته و لمته.

وليد :_ احبج يا احلى عروس .

بدور :_ وليد حاسب انا مب مثل قبل اشضعفي ولدي ببطني .

وليد :_ فديته انا هلولد يا بخته ليتني قاعد بمحله .

بدور :_ وليييد .

وليد :_ زين زين عرفنا .

بدور :_ زين الحين اقدر ابدل و انت تروح تدفع باجي المبلغ لاني لمن ييت مع نوف دفعت لهم المقدم .

وليد :_ ما شاء الله و نوفوه تدري بعد و خاشين علي .

بدور :_ ليش المفاجأة لازم تنقال .

وليد :_ هههههههه تعرفين تسكتيني اوكي يلا بدلي و انا رايح اعطيهم افلوسهم .

.................................................. .......................................

مر الوقت بلمح البصر كل منهم مشغول و اكثرهم ريم و جاسم فاليوم يومهم و اليلة ليلتهم .. مشى الوقت على ريم و جاسم بشكل بطيئ اما بنسبة للعايلة فبشكل سريع لفرحتهم بهالمناسبة

ريم على المغرب قبل الأذان كان شعرها زاهب و المكياج و الباجي تلبس فستانها و الطرحة تتثبت على شعرها

ريم تناظر هناء :_ هنوييي انا خايفة .. احس مب مستعدة لهشي .

تــــــــــــــــــــــــــابـــــــــــــــــــــ ــــــع

[هدباء]

هناء :_ ريوووم ما وعدتيني جذي و لا تخونين وعدج لعمج خلج قوية و الي بتواجهينه شي ماهب يخليج تخافين هزوود .

ريم و طت راسها .. هناء ارفعت راسها :_ ريووم عمري لا تبجين والله المكياج كله بيروح فديت قلبج لا تبجين .

ريم الي انهارت :_ ما اقدر يا هناء ما اقدر امسك حالي خايفة و احس روحي بدخل بغربة قاسية علي و بعيش مع انسان ما اقدر احس فيه بيوم .

هناء :_ ياربي يا ريووم جوفي اشلون مكياجج صار قربي اضبطه لج .

ريم :_ ما ابي هنوي ما ابي ما ابي اي شي ابي ارتاح .

هناء مسحت ادموع ريم و لمتها و تركتها تهدى اشوي

و بعد نص ساعة ازهبت ريم بالكامل و كانت لابسة طرحتها الي كانت تاركتها مثل القمر المخبى وسط نوره

بعد ثواني وصل فراس لهم لياخذهم لبيت ابو طلال ليملجون عليهم و من بعدها يروحون الصالة

هناء :_ يلا ريوم قومي لبسي فراس وصل .

ريم :_ وينها باقتي .

هناء :_ لا تحاتين كل شي انا عطيته فراس باجي تطلعين يلا خلينا نمشي .

و اطلعوا ثنتينهم لسيارة فراس

ريم بالسيارة بنص الطريج :_ فراس من بالبيت .

فراس :_ عيال عمامي و عمامي و الاهل كلهم اهناك و الكل ينتظرونج عشان يملجون .

ريم :_ امي موجودة .

فراس :_ الحريم كلهم ما مشوا لصالة كلهم بالبيت .

هناء :_ ريم ليش تسألين .

ريم :_ هالكثر فرحانين على حزني .

هناء :_ اووووششش رييييوم اشقلنا بلا هذا الحجي .

.................................................. ............................................

جاسم الي كان ببيتهم للحين ما طلع كان يزهب نفسه و معاه زياد

زياد :_ جسوووم تأخرنا .

جاسم :_ زين زين كاني زاهب وينه البشت .

زياد :_ بتلبسه ؟

جاسم :_ مب الحين بس بحمله معاي .

زياد :_ يا ويل قلبييييييي من هذا لي .

جاسم :_ ها ها زيووود اجوفك صرت حمود الثاني .

زياد :_ ههههههههه زين يلا خلصنا تركنا نمشي .. بس لحظة على وين لف لي اجوف هلحلا .

جاسم :_ زيوووود الحين انت الي بتعطلنا مب انا .

زياد :_ جسووم تسمح لي المك طالع قمر و انت معرس بهليلة .

جاسم وهو يقعد على الكرسي الي بصالتهم :_ ياليت اقدر احسس ريم بفحرتي الي تعمر بقلبي ياريت اقدر اخليها تكون مثلي فرحانة بهليلة و ناسة كل شي .

زياد يقعد حذاله و يمسك كتفه اليسار :_ جاسم انا واثق انك اقوى من كل شي و ان طال الزمن لو قصر هلفرحة بتنبض بقلب ريم مثل ما تنبض فيك لكن الله يطلب منك بس تحط الأمل عندك و تصبر مب كل شي بساهل يجيك .

جاسم :_ يعني اتهقى ريم بيوم رح تحبني .

زياد :_ الله وحده العالم و لكن انت عليك اتحاول .

جاسم :_ ان شاء الله .. اقول ما وريتك غرفتي .

زياد :_ انت دومك خوان من امتى صرت وفي لي و هذا انا بحسبت ارفيج عمرك اخر من يدري غرفة نومك اوصلت و ازهبت بعد .

جاسم :_ هههههه اعذرني اشفيك عاد كليتني يلا قومي بوريك اياها و خلنا نمشي من بعدها ما نبي نصيف .

زياد الي انبهر من حلا غرفة جاسم و دعى الله يهنيه مع ريم و من بعد ما جافها انزلوا اثنينهم و تحركوا بالسيارة جاسم لبيت ابو طلال

جاسم لمن شغل السيارة :_ زيوووووود اشرايك نودع اخر ايام العزوبية و نسرع بالسيارة .

زياد :_ جسوم اشناوي عليه تروح المستشفى بليلة عرسك .

جاسم :_ لا تخاف بحاسب بس علشان خاطري اخر مرة .

زياد :_ اوكي بس حاسب بنعطيك هلفرصة عشان باجر لمن تصير معاك المدام ما رح تتجرأ .

جاسم :_ ههههههههههه سكر موضوعك الله يهداك .

.................................................. ........................

بعد ربع ساعة وصلت ريم لبيتهم و اول ما وقف فراس لمح سيارة جاسم تتبركن حذال بيتهم

فراس :_ باين جاسم توه واصل .

دق قلب ريم بقوة بسمع طاري جاسم .. هناء مسكتها :_ ريوووم خلج قوية قومي يلا معاي بندخل من الباب الي ورة و بنصعد لدارج .

فراس :_ يلا ريم انا بنزل اغراضج .

جاسم الي لمح سيارة فراس و كان يعرف ان فراس بيكون مع ريم لمن تزهب و رح يوصلها لبيتهم .. تم بسيارته ما نزل و قلبه يدق بدقات تهزه

زياد :_ جاسم يلا تأخرنا أتركنا نمشي .

جاسم :_ اصبر اشوي باين ريم اوصلت .

زياد يناظر :_ صج والله عيل خلنا نقوم .

جاسم :_ زياد اصبر اشوي انا ما ابيها تلتقي فيني الحين .

زياد :_ ليمتى كاهوا ادخلت .

جاسم :_ اوكي يلا خلنا نقوم .

طلع جاسم و زياد و تحركوا لباب الديوانية الخارجي لرياييل .. أول ما دخل جاسم الكل كان يناظره و يناظر حلاه و أناقته (( رح أوصفه بدخلته مع ريم لا تستعيلون)) .. محمد :_ هلاااااااا بمعرسنا يا هلا و مسهلا حياك حياك .

ناصر :_ اشهلحلا يا جاسسسم عااااشوا والله .

ابو وليد :_ يبه جاسم صيفت .

جاسم :_ اسموحة يبه .

و يدخل فراس الديوانية و يلمحه ابو طلال :_ ها يبه وصلت اختك .

فراس :_ اي الحين وصلت .

ابو طلال :_ عيل توكلنا على الله .

بالطابق الثاني بغرفة ريم كانت هناء مع ريم اصعدوا من الباب الوراني و ما عطوا احد علم ولكن هناء اطلعت من غرفة ريم و انزلت تحت و لمن لقتها لولوه سحبتها قبل لا يشوفها احد و خذتها على صوب

لولوه :_ تعالي زين امتى وصلتوا .

هناء :_ الحين يلا خبري البنات اذا يبون يصعدون لريم يجوفونها .

لولوه :_ يلا سبقيني و انا لاحقتج بخبر الاهل كلهم .

و من بعدها اصعدت هناء لريم .. اول ما دخلت هناء تلقتها ريم :_ وينج انتي وين رحتي .

هناء :_ رحت اخبرهم ان احنا وصلنا و الحين كلهم بيونج اهني .

ريم :_ هنووووي ليش جذي انا ما فيني التقي في احد .

هناء :_ ريوووم خلج قوية اليوم لازم تكونين قدها .

و تدخل بهالوقت نوف الي اسبقت الكل تبي تجوف عروسة اخوها الغالي .. نوف و اهي تطل من الباب على ريم :_ شنوووووو ندخل .

ريم الي لمحت نوف و ابتسمت لها من قلبها :_ ولوا انتي الي تدخلين حياج .

نوف لمن ادخلت بانت لها ريم بحلاها :_ يامحلاااااااااااااااااااااااااااااااج والله طالعة قمر و احلى من القمر نفسه .

و لموا بعض .. نوف :_ فديتج ريووووم اشحلاتج طالعة ليتني مثلج .

ريم بدلع :_ تحلمين اصلاً .

نوف و اهي تطق ريم على كتفها :_ تتغشمرين علي لكن ماعليه حلالج دامج مرت الغالي .

ريم الي لمن اسمعت بهلقب (( مرت الغالي )) تذكرت جاسم و وطت راسها .. اقتربت منها هناء و اقرصتها عشان ما تحسس نوف ان في شي لمن ذكرت بطاري اخوها جاسم

فهمت ريم على هناء و ابتسمت لنوف

بهالوقت وصلوا البنات كلهم و كلهم التموا حول ريم

ملاك :_ ريوووووووووم طالعة قردة على منواااااااا .

ريم :_ ملاكوووه تحلمين بملمح من ملامحي ادري فيج .

مروة :_ ههههههههه مبرووووووك ريم .

ريم :_ اشمبروكه للحين ما ملجنا توها الساعة 9 .

ادخلت بهالوقت شيخة :_ ريوووم يلا زهبي حالج عمي بيدش عليج عشان توقعين على العقد الراياييل اخلصوا باجي توقيعج و تنمجلون لبعضكم بأذن الله .

مريم برباشتها :_ كلللللللللللللللللللللللللللللللللللللللللللللوووو ووووووووش الف صلاة و السلام عليك يا حبيب الله محمد .

و البنات كلهم من وراها و بوسطهم ريم الي كانت البسمة ترسم احلى ملامح على محياها و ادموعها بوسط عينها

البنات :_ الف الصلاة و السلام عليك يا حبيب الله محمد .

نوف :_ و هل مرة لي كللللللللللللللللللللللللللللللللووووووووش .

لولوه و اهي تدخل :_ يا معيرس عين الله تراك و القمر و النجوم متشي وراك .

شهد :_ لولووووووه فديتج قربي اقول عشان اغني معاج .

هناء الي ناظرت ريم و ارتاح قلبها لمن لقتها بالفرحة عايشة هالجو مع بنات اعمامها و عمتها .

و تفاجأهم تدخل عليهم بدور :_ اشفيييييييكم قصروا حسكم لا يوصل لرياييل بالديوانية .

نوف :_ اشفيج بدور والله حلالنا .

مروة :_ بدور نويف شمشربينها قبل لا تيي .

نوف :_ بلا العقرة فيني شربت ميرندا ليمون اشحلاته احسن منج .

و كل وحدة تطلع لسانها لثانية .

بدور تلمح ريم :_ ريووووووووم اشحلاتها هالقمر الي خاشينها وسطكم .

ريم :_ انتي الي فديتج بهالحلا كله .

البنات كلهم على بدور يقومونها بصوت واحد :_ عاااااااااااااااااااااشوووووووووووووا يابخته وليد يا بخته ابو خالد .

بدور :_ وييييييييييي اشفيكم انتوا لا يسمعكم صج و يصدق الحين و ما يطيع يفارجني .

لولوه :_ يا عينييييييييييييييي يا عينيييييييييييي على ابو خالد فديته ولد عمي .

بدور :_ احم احم اغار لا تقولين فديته .

مروة بعناد :_ ويه القمر ولد عمي امووت فيه انا و احيابه .

بدور :_ أي أي ناحسوني والله اوريكم .

و تدخل عليهم ام وليد و من رواها ام طلال و ام مشعل و ام فيصل

ام وليد الي تحركت لريم من بين وسط بنات عمامها كلهم و عماتها

ام وليد اول ما وصلت لمت ريم لها بالأحضان و اجتاح قلب ريم برعشة دفى من قلب هلأم الحنونة و اجتاحتها نوبات الفرح لقلبها و لمتها بالمثل

ام وليد :_ فديتها مرت الغالي يا محلاج و زينج يا بعد روحي و بعد عيوني يا حبيبتي يارب يسعدكم ان شاء الله و لا يجيب الزعل و الفراق بينكم و عن الحساد امعذوة بسم الله .

ريم الي باست مرة عمها على راسها :_ تسلمين لي يا مرت عمي .

ام وليد :_ لا يا يمه من يوم ورايح حسبيني بحسبت امج لا تقولين لي مرت عمي .

ريم :_ من عيوني يا يمه لا خلا منج و لا عدم .

ام وليد :_ تسلمين لي يالغالية .

ام مشعل الي تلقت ريم بعد ام وليد و ضمتها بالمثل و هنتها :_ الله يسعدج و يهنيج يا يمه عمري ما جفت عروسة تناسب عريسها مثلكم سبحان الله خلقكم و سواكم لبعض الله يهنيكم و يبارك لكم بهاليلة .

ريم :_ تسلمين لي مرت عمي والله أن اصيلة و الطيب اصلج .

من بعدها عمتها الي تحبها :_ ريووووووووووووووووم فديت قلبها الي شقى عمر عمتها تعالي المج .

ريم :_ هههههههههه و انتي فرحتي كلها يا عمتي فديتج انا .

ام فيصل و اهي تسحب اخدود ريم :_ طااااااااااااااااااااالعة قمر يالعنيدة على منوا ما ادري .

ريم :_ ولو عمتي اكيد عليج .

ام فيصل :_ تسلمين والله لعمتج الي تحبج فديتج يا يمه عسا ربي يوفجج و ينور لكم دربكم بالهنا و السعادة و يبارج لج بهاليلة و يهنيج مع جاسم .

و اخيراً امها الي كانت تنتظر تفضى بنتها لتاخذها بالأحضان :_ يـــــــــــــــــمه ريييييييييييييم تعالي اضمج زين يالعنيدة الي ذبحتيني بتربايتج من اعنادج .

ريم و اهي تبجي اسبقت امها بالخطوات و لمتها :_ يا احلى ماما بهدنيا .

تواهوا على بعض و تشاركوا هالدموع الي تركوا من موقفهم الكل يحن قلبه و يحس بمثل مشاعرهم

بهالوقت وصل ابو وليد و ناصر و ابو طلال لفوق حذال غرفة ريم و طق الباب ابو طلال .. و بسرعة هناء البست لانها تعرف الحريم كلهم اهني فأكيد هذا احد من الرياييل

افتحت الباب ام وليد و التقت بأبو طلال

ابو طلال :_ اسموحة يا ام وليد نبي ريم من بينكم لتوقع .

ام وليد :_ لا سموحة و لا شي بس ثواني اخذ لك طريج ماكوا غريب اهني .

ام وليد :_ يا يمه افسحوا لعمكم رايد يدخل على ريم .

تـــــــــــــــــــابـــــــــــــــــــــع

[هدباء]

دخل ابو طلال و باس بنته على جبينها و لمها له

ريم الي بدت تبجي ولكن مسكت حالها ما تبي تخرب هالفرحة على قلب ابوها

و بالمثل عمها ابو وليد الي لمها لصدره و باسها على جبينها

و اخيراً ناصر و هناء الي كانت تراقبه بعيونها فز قلبها لمن لقت حلاه بهاليلة و ما قدرت تستوعب جماله اشلون كان صاير كل شي فيه انيق و الي ذبحها اعيونه السود الي تبرق بقوة لمن تقرب من حذال ريم

ناصر :_ ياااااااااااااااه شنو هذي عروستنا والله امبدلين معانا عند الكوافيرة .

نوف :_ هههههههههههه يا حبك للغشمرة عمي هذي ريم اشفيك .

ريم :_ ما عليج منه دواه عندي يعرف اشلون يتغشمر علي .

ناصر :_ هههههههه فديت قلبها هالعروس تعالي لعمج المج انا .

ريم :_ بتبجيني يعني .

ناصر :_ اشقلنااااااااااااا .

ريم و اهي تضحك :_ بتذبحنييييييي .

ابو طلال :_ اسم الله على بنتي .

من بعدها طلع ناصر لطلال و ياب الكتاب المفتوح و بداخل الأوراق الخاصة بعقدهم و يابه لداخل لتوقع ريم عليه .. لمن وصل لريم و ناظرت الورقة المحت توقيع جاسم احذال المكان الفاضي لتوقع حز على قلبها بذاك الوقت وشلون تربط مصيرها بمصير انسان ما تحبه و سبب كل اجروحها و لكنها مجبورة و ما بيد المجبور حيلة

هناء :_ عمري ريووم يلا وقعي .

ريم :_ مب قادرة احس يدي ترجف .

هناء :_ ذكري الله و توكلي عليه بأذنه .

وقعت ريم و قلبها من داخل يصرخ ما ابيه و لا ابي اعيش وياه

و ارتفع صوت اليباب الي وصل لديوانية و فز قلبه جاسم لمن سمع هصوت و قاموا الرياييل يباركون له

و الحريم قام المبارك عندهم .. و بعد لحظات كل منهم زهب و تحركوا بسياراتهم لصالة العرس

ريم كانت بالسيارة و بيدها باقتها و ادموعها محبوسة بعيونها و تركت اعيونها تلمع فيهم .. جاسم الي كان قلبه مع ريم وده بس لو يكون حذالها ولكن عارف اشلون رح تعامله اهي

وصلوا لصالة و ادخلت ريم غرفة العروس الي بصالة لتزهب حالها و تستعد و البنات كلهم معاها

بهالوقت ادخلت عليها هناء :_ يا محلاها ارفيجتي طالعة قمر .. ليش رفعتي الطرحة .

ريم :_ وااايد تعبتني .

هناء :_ اوكي عمري الحين اوصلت زفة الرياييل انا بلبس لانة عمج و ابوج بيدخلون يلبسونج طرحتج و بيزفونج لجاسم .

ريم :_ هناء لا تتركيني لحالي .

هناء :_ ريم اشفيج الله يهداج عمج بيدخل ابوج ما يصير اكون اهني قوي حالج .

اطلعت هناء و دخلوا ابو وليد و ابو طلال لبسوا ريم الطرحة و اطلعوا فيها لجاسم الي كان ينتظرها بفارغ الصبر .. و البنات من وراها يمشون زافينها

مشت ليمن وصلت لحذاله و ارتفع صوت اليباب لمن انفتح باب الصالة العووود الفخم الراقي و بانت ريم الي كان حذالها جاسم للعالم و المعازيم و الكل تم مندهش من حلاهم و بقت العيون متعلقة عليهم

ادخلوا على اغنية بدر لراشد الماجد

و الكل يناظرهم

جاسم الي كان بشته بلون اسود و ثوبه و غترته بيضة و ساعته السودة على يساره و ريحته تفوح من عطره الخاص الرجالي

اما ريم الي كان طولها باين اشقصره لطول جاسم احذالها كانت منورة بفستانها اطويل و طرحتها الي كانت مغطتها و فستانها الي كان الظهر معضمه عاري و الصدر عاري و لكن الفستان كان بشكل روعة مناسب على رشاقة ريم و باقتها معلقة بيدها الي زاهية بنقوشاتها بالحنى الأحمر الايق عليها

حد منكم شاف بالدنيا بدر

مقبل يمشي ومن حوله بشر

من حلاه يزف لناظر ضياه

ان ظهر لناس لو ما ظهر

هذا ما هو بدر ليل يختفي

مع طلوع الصبح وبزوغ الفجر

أو بدر يصبح بعد مدة هلال

هذا بدر مكتمل طول الشهر

لا إلاه ألة الله و على نبي صلوا عليه

هي عروس النور في هذا الزمان

هي ملاك بس في صورة بشر

من غلاها نقول صلوا عالرسول

يلي شفتوها بقلب أو نظر

الله يا نور بهالدنيا نراه

مستحيل انا نشوفه في بشر

أو كحبات الندى ولا المطر

البجل لو مثلها سترة في الحياة

كل غصن فتح بوردٍ حور

والعفا فدموعها يسري بوفا

والوفا يا عينها يسري سمر

شاعر الوجدان وأحلى ما سما

مبدع وإحساسه المرهف شعر

حاسس بالوصف وابتهر

عسا الله يوهبه طولة عمر

الله يحفظها ويسعدها معاه

شيخنا بطيبة فؤاده يشتهر

والله يجعل كل دنياهم هنا

بك نسيم السعد كله والبشر

والتقت شمس الظهيرة بالقمر

وفي محياها بدا الصبح الضيا

مشرق وخدودها واحة زهر

والعيون الي شبه عين المها

تمتزج فيها البراءة بالسحر

الليلة الليلة محلاها الليلة

الليلة الليلة حلوة وجميلة

شعرها ليل كسا الدنيا دجا

حالك متحثرٍ كنه نهار

يحسبه قطعة حريرٍ من لؤاه

والحقيقة هو حرير من شعر

والحسام الي صفا الوجن كساه

يبعث أشواق الحواجب للثغر

والثناياقا الفرج بين الشفا

الغريبة ما كانت ايديهم بيدين بعض و جاسم ترك ريم على راحتها اركبت للكوشة و فستانها من وراها يمشي ليمن أوصلت لكرسي الكوشة الفخم الي كان بشكل رووعة و يهبل

و قام صوت الديجي مرتفع و الكل بقلب فرحان يشاركونهم هليلة .. جاسم ما كان يقدر يمسك حاله من فرحته و اخيراً ريم صارت احذاله و رح يقدر يبرر كل غلطاته لها و تعيش وياه طول العمر و قريبة منه

التف لها و الكل عينهم معلقة عليهم و مسك طرف الطرحة و المعت اعيون ريم لمن حسته رح يرفع الطرحة

قلبه كان يدق بسرعة و ريم بالمثل و الكل عينهم عليهم رفع الطرحة بهدوووء و بانت بحلاها الي دهش كل الحضور و الاهم جاسم الي انصدم من جمالها بهالليلة اشلون كان الحلا يحويها من راسها لساسها و بان فستانها العراي و طقم الذهب الي محاوط صدرها و عيونه الي تلمع بدموعها و جمالها الفضيييع ما كان ينوصف بنسبة لجاسم احتار اشلون يقرب و يبوس راسها

ولكنها لمن رفعت اعيونها له زاد شوقه للحلا هذا كله و تقرب لها لمس اذراعينها و ارتعشت ريم بهلحظة وهو بالمثل تقرب اكثر و باس جبينها و الكل أنأسر نظره بهالموقف نوف هناء بدور شيخة لولوه ملاك مروة مريم شهد الكل كان يناظرهم و الكل قلبه بالفرح يعمر و يدعي لهم .. ام وليد الي كانت ادموعها على خدها و بالمثل ام طلال و القلب يعمر بالفرحة على هلحلا كله وشلون رح يعيشون العمر كله .. جاسم و ريم كانوا اشبه بالعصافير الي التقوا بقفص واحد لتكتمل الصورة و الوحة للكل .. احلى عروسين احلى ثنائي فكان الكل من الفرح مب عارف اشلون يشاركهم هاليلة

من بعدها وصلت نوف بالدبل و التف جاسم لها ..

نوف و اهي تغمز له :_ اشحلاكم ذبحتوني .

جاسم :_ نووف بلا هرجج الحين .

سحب دبلت ريم الي كانت ناعمة على ضعف يدها

التف لها لقاها تناظره أنأسر نظره على عيونها و لكنه ما سرح واايد و همس لها

جاسم بصوت يترك القلب يحن بسماعه :_ ما تبينها .

وطت راسها ريم و مدت يدها و الكل يناظرهم و انشبكت الدبلة بأصبوعها الناعمة .. و رفع يدها و اهي تناظره تبيه يتركها و لكنه عاندها و رفعها و باسها جدام الكل و ارتفع اليباب .. وصلت لها نوف و عطتها دبلة جاسم .. ناظرت جاسم الي كان اعيونه عليها ...

جاسم :_ يلا تراني ابيها .

اجتاح قلبها ريم لأول مرة خجل من جاسم و اهتز قلبها و ارتجفت يدها اسحبت دبلته و نوف تناظرهم لمن التفت له لقته ماد يده بكل طواعية لها ناظرت يده و خجلت تلمسها كانت انيقة و طويلة

تقربت و اشبكت اصبوعه بالدبلة

ارتفع صوت اليباب عندهم و كل منهم تجدم لهم على الكوشة و قبل لا يوصل الجميع جاسم تقرب لها و همس :_ مبروك ريم .

ريم :_ الله يبارك بحياتك .

وصلوا بنات عمامها و حريم اعماما و الكل بدى يبارك لها .. و من بعدها ادخلوا اعمامها كلهم و اخوانها و أوصلوا ليباركون عليهم

ناصر الي لم جاسم :_ الف مبروووووووووك يالكبتن .

جاسم :_ الله يبارج في حياتك .

ناصر يناظر ريم :_ واااااااااااو وااااااااااو واااااااااااو شو هلحلا صدمتيني واايد .

ريم :_ عمييي اشفييك .

ناصر :_ خبلتيني تقولين اشفييك تعالي المج زييين فديت عمرج الف الف مبرووووك .

ريم :_ الله يبارج في حياتك عمي .

ناصر :_ على الوعد .

ريم :_ اكييد .

عيون جاسم الي كانت تراقبها اندهش من حلاها لمن ابتسمت لعمها اشكثر الابتسامة على ويها لايقة و تزيدها حلا مع غمازتينها الي بخدينها

و من بعدها قامت الأغاني بصالة و الكل بالفرح يعمر فيهم و كانت ريم احذال جاسم الي كان للحينه يسرق الوقت يناظرها ليجوف هلحلا و يتأكد هذي ريم لو ملاك .. كانت من حلاها و هدوئها تبهر الناظر لها

لولوه لهناء :_ وااااااااااااااي جوفيهم ايننون هالكناري .

هناء :_ ياليت يقربون اكثر .

لولوه :_ الحين جذي صبري جاسم ما يوطفها فديته ولد عمي .

هناء :_ ياليت .

محمد كان قاعد و يحن على راس ناصر و وليد و مشعل و زياد امتى يدخلون الصالة كان وده بس يشوف شهد

الشباب وهم بالديوانية الي تبع صالة العرس

محمد وهو يوقف و بكشخته الغترة الي كانت بالطريقة القطرية و الشباب كلهم كانوا بهطريقة غترتهم .. محمد :_ يا اخواني انتوا ما تحسون جسوم القرد يتهنى و انا اهني على النار اتلوى يبه امتى بتدخلون .

ناصر :_ يااااااااااااااه شكله اليلة يحسب دخلته مب دخلت اخوه .

زياد :_ امبين .

ناصر :_ خلك صابر مثل مشعل فديته جوفه اشلون صابر .

مشعل :_ سكتوا عني انا واصل حدي ترى الحين اتحد مع حموود .

ناصر :_ والله انتوا بالين حالكم جوفوني انا و زياد محترمين و لا نطالع مني مني .

محمد :_ عمييييييييييييي .

ناصر لزياد :_ بل بل بل ياك الموت يا تارك الصلاة .

طلال وهو يوصل لهم :_ هاااااااااااي .

ناصر :_ اقول انقلع هاي امشربينه شي اليلة يالخوان توك اليلة متذكرنا .

فراس من ورى طلال :_ هههههههه هذا امشربينه حبه اشلون ما ينساكم .

ناصر وهو يفضحه :_ طلووووووووووول ليكوووون .

تـــــــــــــــــــــــابــــــــــــــــــــــع

[هدباء]

و يقرصه زياد :_ اشفيك لا تفضحه .

ناصر :_ هههههههه أي أي ليكوووون حاب لك خدامة الجيران .

طلال وهو يناظر عمه بنظرات قوية :_ شنو شنو اخر زمن .

مضت هليلة على فرحة جاسم و خوف ريم للحيات الي رح تعيشها مع جاسم وفرحة الأهل لهم و جمعتهم بهاليلة تحت سقف واحد و فرحة تجمعهم مع بعض

وصلت الساعة 1 و وصل كاتوا المعاريس و دخلوه لصالة

و لمن ناظره جاسم لقى بالطابق الخامس الي فوق فيه مجسم لعروس و معرس متشابكين المعت عينه بدموعه و لكنه حبسهم و خشهم تمنى يده ما تفارق يدين ريم و لكن حمد ربه على كل حال

و صلت نوف لهم لتخبرهم ينزلون رح يقطعون الكاتوا و من بعدها رح يمشون

قامت ريم بفستانها الفاخر رح تنزل و لكن لقت الصعوبة بالنزلة لثقل فستانها عليها التفت لجاسم و ناظرته .. جاسم استغرب من نظرتها :_ في شي ؟

ريم بخجلها الي حمر اخدودها زوود :_ ممكن تساعدني انزل .

جاسم الي ابتسم :_ ولو اكييد مسكي يدي .

ريم ناظرته و لكنها انصاعت لأمر و لمن مسكها حست بدفى يدينه و ارتجفوا اثنينهم شبك يده بيدينها لينزلها و تحسس صغر يدها و اول ما نزلوا سحبت يدها من يده ناظرها بأسف و لكنها ما كانت عايرته اي اهتمام و تحركوا للكاتوا الفخم الي كان من حوله شموع بحجم كبيييير و منورة المكاااااان

التموا حولهم البنات للعايلة و الحريم كلهم و مسك جاسم السجين الي كانت بنهايتها شريطة حمرة و لمن ناظرت ريم السجين تبي تمسكها لقت لازم يدها تلمس يده يالله يعين ربي تقربت و لمسته ناظرها ببتسامة ما عطته ويه و بدوا يقطعون الكاتوا من الطابق الخامس للأول

بدور تناظر ريم بعد ما قطعوا الكاتوا :_ مبرووووووووك ريم ربي يهنيكم و بالمبارك يا جاسم السموحة ما قدرة اوصلكم الكوشة اثقل زايد علي .

جاسم :_ لا تقولين جذي الله يسهل عليج يا ام خالد و يبارج في حياتج .

نوف :_ جسووووووم يلا كاهوا انا قصيت قطعة الكاتوا بيدي يلا عطها ريم بيدك .

ريم تناظر نوف .. و بنات عمه كلهم :_ اي اي يلا جاسم تكففى طلبناك .

جاسم ما حب يردهم و حمل قطعة من الكاتوا .. ريم تناظره و تهمس له :_ ما ابي .

جاسم :_ ريم علشان خاطرهم مب علشاني .

ريم أسرها بكلامه و تقرب ليعطيها القطعة حست القطعة رح تطيح مسكت يده لا أرادياً و ناظرها اخذت قطعة بسيطة بثمها و تبعدت عنه

و قاموا يصفقون له بنات عمه :_ عاشوااااااااا ابو محمد .

من بعدها ادخلوا الرياييل

و محمد اول ما دخل وصل لجاسم و ين ما كانوا اقبال الكاتوا و ريم احذاله بس لاهية مع بنات عمامها و هناء

محمد يتحرك لجاسم :_ هااااااااااااي حبيبتي .

جاسم يناظره :_ شنهواااااااااا .

محمد :_ ندري ندري ريم تغار عليك .

جاسم :_ انت ليمتى ما بتثقل .

محمد :_ انت اشعليك مني الحين انا ابي جوف حبيبتي وينها .

جاسم :_ ههههههههه تحلم تجوفها انا موصيها ما تعطيك ويه .

محمد :_ صج والله اقول انقلع مع حرمتك .

جاسم :_ اوووووه صار لي حرمة انا بعد .

محمد :_ اييييييي ليمون مب مدليها كاهي على يسارك .

جاسم :_ اقول اذلف احسن لك .

محمد :_ مالت عليك .

محمد تبعد عن جاسم و لكنه لمح بنت مع عمته ام فيصل فقال نضربها ضربتنا اكيد هذي شهد نروح نسلم على عمتي و نلقطها

محمد تحرك لعمته و أول ما وصل لها ناظرته عمته و تجدمت له و لمته :_ هلا بولدي محمد يارب من هذا لك يا نظر عيني امتى افرح فيك مثل ما فرحت بجاسم الغالي .

محمد :_ تسلمين لي عمتي ان شاء الله تفرحين فيني و بنوف و بكلنا بأذن الله و يفرحج بفيصل و نواف و شهد و مريم.

شهد كانت تناظره من بعيد لانة امها تبعدت عنها و راحت تسلم عليه بعيد عنها و اهي قلبها من الفرح بين على حلاه صاير قمر كل ما يكبر يحلا زوود

ام فيصل :_ الله يسمع منك يا يمه .

محمد :_ يلا انا استأذن بس لمن لقيتج قلت ايي اسلم عليج .

ام فيصل :_ خذ راحتك يا يمه .

محمد و عينه تراقب شهد مر احذالها و قلبه من الفرح بين اخيراً لقاها

و مضت هاليلة على فرحتهم و جمعتهم و مشوا كلهم من الصالة يزفون المعاريس لبيت ابو وليد

بطلعتهم من الصالة تأخرت نوف بلبسها لأنها كانت مع ريم لمن بدت تلبس فكانت أخر وحدة بغرفة العروس الي باصالة

بسياةر مشعل كانت معاه ملاك و مروة .. اول ما ادخلت مروة :_ مشعل نسيت شي بغرفة العروس تقدر تييبه لي .

مشعل :_ ان شاء الله بس شنو اهو .

مروة :_ جنطتي .

مشعل :_ اوكي ثواني .

نزل مشعل و تحرك لداخل الصالة توجه لغرفة العروس و أول ما فتح الباب لقى نوف بويهه بترفه اشيلة لتتغطى و تطلع

تعلقت عيونهم على بعض و ما حسبوا للوقت الي بدى يمر بينهم

مشعل :_ نوف .

نوف وطت راسها :_ هلا مشعل .

مشعل :_ هلا فيج شتسوين اهني .

نوف :_ البس لاني تأخرت مع ريم لمن بدت تلبس ليطلعون .. عن اذنك لا يمشي عني جاسم .

مشت نوف و مسكها مشعل :_ نوف .

التفت له و ناظرته ترك يدها بسرعة و ناظرها :_ ما كنت اقصد بس وحشتيني .

نوف و اهي تحس رح تموت من الفرح :_ و انت اكثر باي .

ضحك مشعل على خبال نوف و دخل اخذ جنطة مروة و تحرك لسيارة وهو يدعي لمروة اول مرة تصير فاعلة خير عليه بشي

…………………………………………………………………………………………..

حيات يديدة أرتسمت بعيون كل من جاسم و ريم و فرحة أدخلت بقلوب كل الأهل لأرتباط مصير هلثنين بمصير واحد

وشلون رح تكون حيات جاسم و ريم ؟

طيبة ريم الكبيرة هل رح تكون لها دور بحياتها مع جاسم ؟

و شنو اهي المفجأة الي مزهبها جاسم لريم ؟ و هل رح تعجبها ؟

أحداث يديدة تسأولات يديدة و كل هذا لمن تبقون معاي

أنتظروني بالجزء الثالث عشر الفصل الثاني

تحياتي لكم

.. هدباء ..