[I can]

صباحكم مود لا باس به

تعرفون عاد الحريم بشكل عام ينبشن فالماضي والحاضر الين ما يظهر
الهن سبب للشكوى ويخلي مدة أحزانهن اطول < أحسه لا ارادي
صار خلاص

المهم : اشحال كلن بحاله ؟

من طلعت سالفة الواتس آب وكل ربيعاتي وهلي حاشريني بالقو
ليش ما تسوين الواتس آب !
أحيد وحده من ربيعاتي كانت ترمسني فالفون وتمت تحاول فيني
وقالت ما بصك عنج إلا بوعدوقلتلها خلاص يصير خير وأنا أضحك وهي
إلا مصره وتقولي أول ما تصكين عندج نص ساعه بس
المهم تميت أقولها أوكيه بس أبى أفج عنها وأنا مب ناوبه أصلا !
ودوم السؤال ليش ما تبين ؟
وما تعرفين فلانه وفلانه عندهم ويلا ويلا !
ع بالهم بتشجع جيه وأنا العكس تماما ..!

وطبعا مستحيل أقولهم ليش ؟
بس أموه وأتهرب .. والصدق هو : إني ما أبغي أسولف وي حد !
بلا استثناء ~ اليميع !

في منهم وايدين غالين ع قلبي ولكن أنا ما قمت أحب أسولف وهالتواصل
الي يكون دوم صرت ما أدانيه ~! وطبعا بيننا اتصال بين فتره وفتره او مسجات
وأحب اللمات وأسير وأسولف وأضحك عادي فالكل عشان جيه مستتغرب
وع بالهم أنا أول من بيكون ~!
بمعني آخر " ماحد ملاحظ علي هالشي

+ عالم [ I can [ .. الحقيقي ، ماحد يعرفه إلا هي !

طبعي الشي الي يكون صدق تاعبني أو مزعلني أو حتى شي
يونسني أو شاغل بالي !
مستحيل حد يعرفه فهالكون .. !كل الأشياء التي تظهر لهم مجرد قشور بس !

< مره صدمتني وحده من ربيعاتي .. يومها كنت مضايجه وقالتي
شو فيج ؟ أحس فيج شي ؟
وقلتلها سبب عادي " يعني مب الرئيسي .. ودوم يوم يكون فيني شي
وتلاحظ ع ملامحي أو صوتي وتسألني وطبعا أعطيها من الاسباب الفرعيه

فمره قالتلي شي صدمني " ماشاء الله عليها لبيبه هي الوحيده
الي عرفت عني هالطبع" قالت انتي الين متى
كاتمه كل شي فخاطرج ؟
قلتلها بالعكس :عادي أخبرج
هي : ضحكت وقالت تخبريني بس الأشياء الفرعيه اما الي صدق
تتألمين منه مستحيل تقولينه .. الشي الي فالأعماف مستحيل يظهر !
وطبعا أنا : لا تعليق .. ضحكت بس

وصارت أداتي الوحيده للتنفس الكتابه سواء الخواطر او حتى الهذره
ومع ذلك الي يظهر منها شي بسيط !

تصدقون بس أحب هالطبع فيني مرات وخاصه يوم أكون مضايجه
وأيلس أسولف وي روحي وأطبطب ع نفسي
" صدقوني شي جميل الحوار مع الذات ب
كل عطف ورحمه "

أحس إني مب محتايه لحد أبد