السلام عليكم ورحمة الله وبركاته ’’
القصص والرويات طبعا لها أهلها وكتابها ولكن حبيت أخوض التجربه لا أكثر ،
وهذي أول مره فحياتي أكتب قصه + أنا بالنادر جدا أقرا قصص وروايات فما عندي
أي خبره في فن كتابة القصص أو الروايات ، فالسموحة لو ما قدرت أقدم شي يتناسب
مع الذوق العام ،، وأتمنى تنال استحسانكم .. 
الشخصيات :
• سلامه : 23 سنة ، تدرس فـ الجامعة صار إلها 4 سنوات
• عبيد : 25 سنة ، ضابط في القوات المسلحه ، أخو سلامه الوحيد .
• مهره : 23 سنه ، ويا سلامه وهن ربيعات الروح بـ الروح
• سعيد : 32 سنة ، مدير بنك ، معرس وعنده بنيه ..
• روضه : 24 سنه ، ، ربيعة سلامه ومهره يلتقن
• في بعض الكلاسات في بعض المواد الجامعيه ..
الجزء الأول :
ماما ، ماما ، قومي احين يجي وقت جامعه ، يلا بعدين انت في مشكل ، انت في تأخير !
سلامه : بطلت عيونها وطالعتها وقالت بصوت كله رقاد : زين زين أحينه بنش ولفت ع الصوب
الثاني وكانت عيونها حمر من كثر الرقاد لي فيها ، وبليّا حس، ردت رقدت ..!
عقب نص ساعه ..
جوجو : مامااااااااااااا (بصوت يطيح قلب من يسمعها يوم تزاعق) انتي ما في يقوم !!
سلامه من الروعة انقزت وعيونها مبطله ع الآخر من الخوف وقالت وهي معصبه بـ القو :
بسم الله شُبلاج طيحتي قلبي !!كم مره أقولج لا توعيني جيه كم مره أقولج شوي شوي كم مررر ............
وسكتت وخذت نفس عميق وازفرته بتأفف وعقب طالعتها بابتسامه وقالت : زين جذيه يوم أعصب عليج !
جوجو : ما في مشكل ماما انتي واجد كويس ، بس انتي في يقوم من نوم ما في كويس
( وضحكت جوجو ، وضحكت سلامة من ضحكتها )
و عقب ما ظهرت جوجو حطت راسها عـ المخدة وهي راصه ع عيونها بيديها وقلبها يدق بقوة وقالت أستغفر الله و
أتوب إليه ! أستغفر الله وأتوب إليه .!! الله يهديج يا جوجو الله يهديج وبس .
عقب نشت وبطلت الدريشه واستنشقت هواء عميق وهي اطالع في السماء وكان الجووو وقتها مغيم ابتسمت وقالت:
سبحان الخالق التواب !!!
وفجأة وسط اندماجها مع هالمنظر الغاوي سمعت:
ترن ، ترن ، ترن .. ،، وعقدت حواجبها وقاالت منو بيدق أحينه ؟؟!!
وسارت عند شبريتها وشلت التيلفون .. وأول ما طاحت عينها ع الشاشة شافت اسم : مهاري
ووشقت الحلج وعيونها تبرق من الوناسه وردت وقالت :مرحبا مليوووووووون
ولا يسدن والله ..
مهره : مرحب بج زود الغاليه ..
سلامة : شحا .......
مهره قاطعتها : .. انتي وينج باقي 10 دقايق ع الكلاس ..!
سلامه : يختي ما وعيت ع صوت المنبه ونشيت متأخر بس
ربع ساعه وبيي إن شاء الله ..
مهره : اوكى بس لا تبطين أكثر ..و يلا فـ داعة الرحمن ..
سلامه : بإذن الله ، في أمان الكريم ..
وتأخرت سلامه نص ساعه عن الكلاس .. وأول ما حدرت الكلاس طالعها الأستاذ من فوق لتحت وطالع فساعته
لي فـ يديه وأشر إلها عليها .. وهي فهمت انه يقصد يايه عقب كم حضرتج !!
ويت تبى تبرر .. قالها بدون مقدمات : برع !!!!!!!!!!
طالعته بنظرة استغراب وقهر وقالت : أوكيه !
وأول ما ظهرت قال جدام الطالبات وفي عيونه نظرة اشمئزاز : ، أكرررره هالنوعيه من البنات !
مهره : حست بسجين في صدرها ،، ليش جيه يقول عن سلامة شو سوتله!! توه أول كلاس لنا معاه فهالسمستر !
وعقب الكلاس سارت مهره الكانتين لأنها متوقعه ان تكون سلامه هناك !!
بس ما لقتها ودقت إلها : وينج ؟؟
سلامة : هلا فـ المصلى .. (وكان صوتها مبحوح) ..
مهره : خلاص عيل بييج أحينه
سلامه : أوكيه ..
ويوم كانت مهره تمشي فالدرب فخاطرها تقول أففف مقهروه من هالأستاذ وماعرف
أدس شي ع سلامه ، لكن هالمره لازم ما قولها عشان ما ضايجها ..
ووصلت المصلى وشافت في ايدين سلامة كتيب ويالسه تقرا فيه وواضح من يلستها انها
مضايجه فكانت مهره تبى تلطف الجو ويلست حذالها وقالت :
ماعليه سلامه بعض الاساتذه أونهم يبون يسون إلهم برستيج وهيبه من أول يوم !!
تحيدين أول سنة إلنا فـ الجامعه .؟ ، فأول كلاس إلنا يوم طردني الأستاذ لأني
متأخرة ولا بعد حادره الكلاس أسولف وأضحك بصوت عالي وأنا مب منتبهه لوجوده
فبعض الناس(وطالعت سلامه بطرف عينها) وكملت: ضحكو عليه ويا بنات الكلاس ،
وكنت عادني أيامها متأثره بحركات المدارس وقرصتج وهو يطالعني ،، فعصب زياده وقال :
وهو يزاعق : براااااااااااااااااع
وشي ناس ما يستحون جنهم إلا يطالعون فلم كوميدي تموا يضحكون ويطنزون "
وكانت مهره اطالع سلامه وتضحك "
سلامه طالعتها وضحكت ضحكة باهته وقالت: هيه هيه أحيد ..
مهره : يعلها هالضحكه مديمة ياربي ..
بس مهره حافظه ربيعتها عدل وشافت فعيونها الضيج والقهر وقالت : ما يحتاي
نكبر الموضوع أكثر وأنا اختج .. انتي اكبر عن جيه ..
سلامه ماردت ونزلت راسها وتمت اطالع فالكتيب وتنهدت !!
مهره صخت شوي وتمت تتريا سلامه تنتطق بشي وعقب طالعتها بنظرة كلها
حيره ه ه وقالت : سلامه !
سلامه رفعت راسها وقالت : خلاص ما فيني شي الا هي وساوس مالها معني ،
وابتسمت وقالت قومي خل ناكل شي ترى ما تريقت ويوعانه حدي !!
مهره : كفو هذي سلامي لي أعرفها .. بس ع حسابج ترى هههههه
سلامه : ههههههه دومج زطيه .. يلا شو نسوي اتحركي جدامي بس
وقامن وهن يضحكن ويسولفن ...!! وفالدرب لقن روضه فويهن وسلمن عليها
روضه : أهليييييييييين ولوت ع مهره وهي تقول : تولهت عليج وينج
يا لقاطعه ؟؟!!
مهره : هلا والله ، سمحيلي فديتج بس مشاغل الدنيا !!
روضه : لا لا عذر مب مقبول ،،
ويلست تسولف إلها وهي مب منتبهه لـ سلامه وفجأة انتبهت ولفت صوب سلامه
تسلم وويها أحمر من الفشله تقول لمهره: خس الله ابليسج لهيتيني بالسوالف عن
السلام ، وضحكت مهره وقالت عاااااااااااادي يوم ان السالفه عند سلامه فارتاحي
الأمور طيبه ،،
وحطت سلامه ايدها ع جتف روضه وهي مبتسمة وقالت : أفاااا عليج عادي ما
صار شي .. وترانا سايرات صوب الكانتين نبى نتريق شو رايج ترابعينا خل نسولف
وياج ونعرف آخر أخبارج وترى مهره عازمتنا ع حسابها وكانت اطالع مهره وتضحك ...
مهره اطالعها بنظرة تقول فيها انزين بروايج عقب تبين تفشليني جدام البنيه عشان أدفع
هااااا ؟؟ وقالت بابتسامه مصطنعه : أفاااا عليكن من عيوني " وسلامة فخااااااااااطرها
ميته ضحك ، وفنفس الوقت تحس انها مب مرتاحه لهالبنت والسبب ........... !! 
// ~ يتبع