- السلام عليكم ورحمة الله ..
من مدة قريبة في المدرسة ..
كانت الأستاذة تشرح لنا وحدة من دروسها المملّة ، والفصل هادي على أساس إنها أول حصة والبنات نايمين ، قعدت أتلفت حولي أدوّر شيء يلهيني ، لفت نظري وحدة من زميلاتي البعيدات عنّي في الفصل ، كانت تعابير وجهها تجميع بين (القرف ، الاستنجاد ، الرّغبة بالبكاء) ، حاولت أستنتج سبب الضيق هذا لكن ما قدرت ، على العموم حطيت راسي على الطّاولة ونمت إلى ما رنّ الجرس ، كان علينا بعدها حصّة فراغ ، وكالعادة تجمعوا البنات في دوائر ، شفت زميلتي المتضايقة جالسة لحالها لأن صديقتها الي جنبها غايبة ، استأذنت منها وجلست معاها ، ما أمدانا نسولف وكذا إلا فاجأتني بجملتها: أنا ودّي أغيّر مكاني وأجلس أي مكان بالفصل لو عند الباب! استغربت منها ، سألتها عن السّبب ، أشّرت على البنت الي جالسة قدّامها وقالت: هذي سبّبت لي مرض نفسي ، ما قد مر يوم سلمت من ريحتها !! كانت هذي مو أوّل ولا آخر شكوى أسمعها عن هذا الموضوع ، ما يمر أسبوع أسبوعين إلا وبنت جاية تشتكي لي من نفس السّالفة! أنا أبي أفهم ليش؟ للأسف واحنا الجيل المتحضر المتعلم ، ما نهتم بأهم شيء ، إلي هو نظافتنا الشّخصية! إن الله جميل يحب الجمال ، ومن أساسيات الجمال المهمّة (النظافة) ، أذكر مرة كنت رايحة عرس ، رحت للمغاسل أدور لأني طفشت من الجلسة على الكرسي ، كنت أتفرج على الي يدخلون ويطلعون ، الي حاطة طبقات مكياج تبي تروّع المعازيم والي قماش فستانها كأنه ستارة – اللهم لا شماته - لفت نظري وحدة ما شاء الله أعجبني ذوقها باختيار ملابسها وشعرها وكل شيء ، كانت داخلة المغاسل عشان تصلّح مكياجها ، شاءت الأقدار إنها توقّف جنبي ، أنا طلعت عيوني من مكانها ، تركت مكاني وفضلت إني أنطق بالكرسي حقّي وكرهت اللحظة الي قررت أروح فيها لهذا العرس! البنت لما مرّت جنبي بغيت أدوخ! توقّعت إنها ما تروّشت من شهر يمكن ، معقولة فيها ناس تحرص على كل شيء في مظهرها وتصرف الوقت والجهد والفلوس عشان تطلع بأحسن مظهر عند النّاس ، وبالأخير ينهدم هذا كلّه مع ريحتها الفتّاكة! حرام يصير كذا ، الأجيال القديمة كان ممكن نعذرهم ، كانوا يعانون مشقّة في إنهم يلقون حتى مويه للشرب ، أنتِ كل شيء متوفّر لك ، بضغطه زر تتحكمين بكل شيء ، معقولة وصل العجز إنّك توقفين تحت الدّش عشر دقايق كل يوم؟ إيه كل يوم ، أجواءنا الجميلة تفرض علينا ، الشّمس الي تحرقنا وتخلينا نموت من الحر و(العرق) ، المفروض الوحدة مننا كل يوم تتحمم ، مرة وحدة من صديقاتي جايتني وجهها أسود ، حسبت مات عندهم أحد ولا سقطت ولا شيء ، جيت بسألها وش السالفة قاطعتني ، قالت لي إن فلانة الفلاني الي معانا بالفصل ، ونشوفها كل يوم مستشوره شعرها وفاكّته وكل يوم حاطة لي مناكير لون وتتفنن بألوان الملابس الي تلبسها ، تقول سألوها البنات من متى مستشورة شعرك؟ قالت بكل بساطة: الثلاثاء الي فات !!! كان اليوم هو يوم الاثنين ، تصوروا من أسبوع ما لمس شعرها المويه! من أسبوع ، والله لما سمعت السالفة تذكرت النكتة هذي (فيه قمل عايشين بقحط ليه؟ لأنهم عايشين على راس واحد ما يتروش) ، أدري إن النكتة ماصلة ، وكل ما سمعتها قعدت أتهزا باللي مألفها ، وما في يوم بحياتي توقعت إن ممكن يكون صدق ، على فكرة البنت الي أتكلم عنها البنات بالفصل يدعون البنات دائما إنها ما تتحرك ، عشان ما تنشر عطرها الفواح ، بتقولون يمكن شعرها (خشن) ، وما تبغى تغسله كثير عشان ما يتحوّل ليفة ، ما فيه اختراع اسمه (زيت ، بلسم ، شامبو للشعر الجاف) ، وعاد لو كانت حالتها حرجة مو شرط تغسله كل يوم ، بس رجاءً ما تتعدى ثلاث أيام ، طبعاً تغسل جسمها كل يوم ولا وش الفايدة؟ وأهم شيء تحافظ عليه مزيل العرق (الديودرينت) ضروري تستخدمه كل يوم بعد ما تتروش ، لو تتروش عشر مرات باليوم ، مو تستخدم لي ليمون ولا الثاني والثالث وتقول أنا ما أستخدم إلا أشياء من الطبيعة بس! حطي ليمون حطي بهارات إن شاء الله ، بس ما تغني عن الديودرينت أبداً ، ما كتبت هالكلام إلا حفاظاً على مشاعر البنات ، مثل الي بالقصة الأولى ، وغيرها كثير كثير! ولمصلحة البنات المعنيين بالموضوع ، كله عشانهم ، وراح يعكس عليهم بنتائج سيئة جداً جداً جداً ، أهمّها الراحة النفسية ، مستحيل إنسانه تكون (وصخة) تكون سعيدة ولا مو متضايقة ، كله ينعكس على نفسيتها ، ولا أبغاها بعدين تجي تقول أنا ركبي سوداء أنا أكواعي غامقة! لا حبيبتي ، ما اعتنيتي فيهم من البداية وتبغينهم بقدرة قادر يتحولون بيض! وطبعاً علاقاتها الاجتماعية راح تكون في الحضيض ، زميلاتها راح يتجنبونها بالمرة ، صديقاتها بيحاولون يبعدون عنها ، والطّامة الكبرى على أهلها المساكين ، البنات من وراها والله ما يرحمونها ، فيه بنات معروف بين المجتمع إنهم (وصخات)! ليش أخلّي النّاس تتكلم فيني وتنتقدني؟ ليش ما أتجنب هذا كله وأحافظ على نظافتي ليه؟ وسلبيات كثير لو عديتها من كثرتها ما راح أخلّص ، رجاءً من بعد اليوم ، ما أبي أسمع شكاوي من هذا الموضوع ، ما أبي أمشي بين النّاس وأنا سادّة خشمي ، أهم ما في البنت أخلاقها ومظهرها ونظافتها ، كله عشان مصلحتكم ، نبغى نعيش بمجتمع نظيف! وأخيراً أعتذر على قوّة اللّهجة ، لكن الكلام كان بنفسي من زمان ، وطالع من صميم القلب لكل بنات جيلي ، كان ودّي أتكلم أكثر لكن لو تركت لنفسي المجال ما راح أوقّف ، أهم شيء إنّي وصّلت الفكرة وأتمنى إنّها تتطبّق ، أنشروها لتعمّ الفائدة ، وشكراً لمتابعتي للأخير 
..
،
- تأيديني بكلامي؟
- لو كنتي تأيديني وش تحسين أفضل طريقة للتغلب على هذي الظاهرة؟
- رايك بالبنات من هذي النّوعية؟
* سيتم نشر الموضوع في الإيميل ، وهو من جهدي الشّخصي ..
ohw []~Wh FggfkJhj tr'D >>
الموضوع الأصلي :
خاص جدًّا [للبنـات فقط] ..
||
القسم :
"الأرشيف" مغلق
||
المصدر :
منتديات بنات دوت كوم
||
كاتبة الموضوع :
M A H O O Y